कोशीका चार जना पत्रकारलाई प्रादेशिक पत्रकारिता पुरस्कार

विराटनगर । कोशी प्रदेश सरकारले चार जना पत्रकारलाई प्रादेशिक पत्रकारिता पुरस्कार प्रदान गरेको छ । प्रदेशमा बसेर लामो समयदेखि पत्रकारिता गरेका पत्रकारहरु सोमनाथ सुशेली, रोजेश विद्रोही, चन्द्रकला (अम्बिका) भण्डारी र सटेन्द्र जबेगुलाई एकएक लाख रुपैयाँ राशिको ‘प्रादेशिक पत्रकारिता पुरस्कार’ प्रदान गरेको हो ।

कोशीका मुख्यमन्त्री हिक्मत कार्कीले दोसल्ला र सम्मानपत्रसहित उनीहरुलाई पुरस्कार प्रदान गरेका छन् ।

उक्त अवसरमा मुख्यमन्त्री कार्कीले कोशी प्रदेश नामकरणका विषयमा भएका असहमतिहरु शान्तिपूर्ण रुपमा राख्न अनुरोध गरे ।

कार्यक्रममा नेपाल पत्रकार महासंघ कोशी प्रदेशका अध्यक्ष लीलावल्लभ घिमिरे, पुरस्कृत व्यक्तित्व सोमनाथ सुशेली र चन्द्रकला भण्डारीले पत्रकारिता क्षेत्र मर्यादित र जिम्मेवार हुनुपर्ने धारणा राखेका थिए ।