फ्रेण्ड्स क्लवको सहज जीत, मनाङ र पुलिसले बाँडे अंक (भिडिओ)
नेपाल प्रेस
२०८० वैशाख २५ गते १८:३५
काठमाडौं । राजधानीमा जारी सहिद स्मारक ए डिभिजन लिगमा फ्रेन्ड्स क्लबले सहज जीत निकालेको छ ।
सोमबार ललितपुरको च्यासल खेल मैदानमा भएको खेलमा फ्रेन्ड्सले एफसी खुमलटारलाई ३-१ गोल अन्तरले पराजित गरेको हो ।
फ्रेन्ड्सको जीतमा रफिक अमानुले चौथो र सोह्रौं र सन्तोष खत्रीले ७८औं मिनेटमा गोल गरे । खुमलटारका लागि मिसुकेले ६७ मिनेटमा सान्त्वना गोल फर्काए ।
फ्रेन्ड्स १६ खेलबाट १९ अंकसहित तालिकाको नवौं स्थानमा छ । खुमलटार १६ खेलमा १७ अंकसहित तालिकाको तेह्रौं स्थानमा झरेको छ ।
सोमबार नै एन्फा कम्लेक्स सातदोबाटोमा भएको खेलमा मनाङ र पुलिसले २-२ गोलको बराबरी खेलेका छन् । मनाङका लागि रोशन राना मगरले ३३औं तथा सइद आजमल डाभोल्टातेजनोले ४४औं मिनेटमा गोल गरेका थिए ।
पुलिसका लागि अहमद हिजाजीले १६औं र ७१औं मिनेटमा गोल गरेका थिए ।
मनाङ १६ खेलबाट २० अंकसहित सातौं स्थानमा छ । पुलिस १६ खेलमा १६ अंकसहित तालिकाको पुछारमै कायम छ ।
नेपाल प्रेस
प्रकाशित: २०८० वैशाख २५ गते १८:३५
प्रतिक्रिया
सम्बन्धित खवर
