टोपबहादुरबारे ओली : नजिकका मान्छेले मलाई फोन गरेका थिए, कानूनलाई सहयोग गर्न सुझाव दिएको छु

काठमाडौं । नेकपा एमालेका अध्यक्ष केपी शर्मा ओलीले पार्टीको निर्णयपछि नक्कली शरणार्थी प्रकरणमा फरार रहेका नेता टोपबहादुर रायमाझीको निकट व्यक्तिबाट फोन आएको बताएका छन्।

केन्द्रीय समितिको बैठकलाई सम्बोधन गर्दै सो प्रकरणमा सत्य छानबिन गर्नुपर्ने बताए।

उनले भने, ‘यो केस निष्पक्ष छानबिन हुनुपर्छ हामीले सोचेका थिएनौँ टोपबहादुरजी कतिको संलग्न हुनुहुन्छ हुनुहुन्न उहाँ संलग्न हुनुहुन्छ भन्ने हाम्रो अनुमान पनि होइन। सोचेका पनि थिएनौँ। तर, हामी आश्चर्यचकित बन्यौँ उहाँलाई पक्राउ पूर्जी जारी गर्‍यौँ। अलिअलि कुरा बुझेको हुनाले सोझै पैसा समाउनेहरू छोड्ने, अनि टोपबहादुरलाई पक्राउ पुर्जी जारी गर्ने किन गर्‍यो होला। मैले प्रश्न गरेको ? त्यसभित्र केही त नभएको होला त।’

पक्राउ पुर्जी जारी भएपछि टोपबहादुरले बाहिर आएर प्रहरीलाई सघाउने विश्वास लिए पनि त्यसो नभएको बताए।

उनले भने, ‘मैले पछि सुनेँ प्रहरीले अभद्र व्यवहार गर्न खोज्यो त्यस कारण अदालतमै उपस्थित हुने विचार गरे भनेर उहाँले भन्नुभयो भनेर। पार्टीले अनुसन्धानमा सघाउनुस् भनेर निर्णय गरेपछि निकटका व्यक्तिबाट के गर्ने भनेर मलाई फोन आयो। हाम्रो नीति यस्तो छ भनेर बताइदिनुस् उहाँले आफूलाई प्रहरी समक्ष प्रस्तुत हुनु भन्ने पार्टीको निर्देशन छ भन्ने सुनाइदिनुस् भने। हिजो सरकारी स्रोतबाट प्रहरीमा उपस्थित हुने कुरा जानकारी पाएको थिएँ।’

भागेपछि आरोपमा आशंका गर्ने ठाउँ रहने बताए। यो प्रकरणमा सही छानबिन नगरेर सरकारले राजनीतिक फण्डा गर्न खोजेको बताए।

उनले प्रधानमन्त्री पुष्पकमल दाहाल प्रचण्डलाई लक्षित गर्दै भने, ‘अहिले आफ्ना कार्यकर्ता मोभिलाइज गरेर महान भ्रष्टाचारविरुद्धका नायक, मेरो भ्रष्टाचारको विरुद्ध नयाँ लडाई सुरु भन्दै फाइँफुइँ गर्दैछन्। अहिले धेरै कुरा नगरौँ। गफ दिनुभन्दा अगाडि यसो सम्झिनुस् या ऐना हेर्नुस्।’

ओलीको भनाइ यस्तो थियो :

‘उहाँ यो प्रकरणमा संलग्न हुनुहुन्छ भन्ने सोचेका थिएनौँ । त्यस्तो अनुमान नै थिएन । पक्राउ पुर्जी जारी भएपछि आश्चर्यमा पर्याैँ । अलिअलि केस बुझेका हुनाले मैले सोझै पैसा समाउनेहरूलाई छोड्ने अनि टोपबहादुरलाई पक्राउ पुर्जी किन जारी गरियो होला भनेर मैले प्रश्न गरेको थिएँ । त्यसभित्र केही नभएको त होइन होला नि । केही त थियो होला ।

मैले सोचेको थिइनँ, टोपबहादुरजी यसरी बाहिर जानुहोला भन्ने । पछि मैले सुनेँ, प्रहरीले अभद्र व्यवहार गर्न खोज्यो, त्यसैले सिधै अदालतमा जाने विचार गर्नुभएको भन्नुभएको छ । उहाँको निकटका मान्छेले मलाई फोन गरेका थिए । के गर्ने हो भनेर सोधे । मैले पार्टीले गरेको निर्णय जानकारी गराएँ । हाम्रो नीति यस्तो छ, उहाँले आफूलाई प्रहरीसमक्ष प्रस्तुत गर्नु राम्रो भन्ने सुझाव दिएँ । यो कुरा उहाँलाई सुनाइदिनुस् भनेँ ।
हिजो उहाँ हाजिर हुन आउनुहुन्छ भन्ने सुनेको थिएँ । यो सूचना सरकारी स्रोतबाटै मलाई प्राप्त भएको थियो । तर, खोइ किन हाजिर हुनुभएन । अहिले पनि भन्न चाहन्छु, हामी कसैमाथि आरोप लाग्दैमा दोषी भइँदैन । तर, आरोपबाट तर्किन खोज्यो भने त्यसले समस्या निम्त्याउँछ ।’