शरणार्थी प्रकरणमा जोडिएकाहरूको राहदानी तत्काल जफत गर्न रास्वपाको माग

काठमाडौं । राष्ट्रिय स्वतन्त्र पार्टीले नक्कली भुटानी शरणार्थी प्रकरणले अन्तर्राष्ट्रिय समुदायमा नेपाल र नेपालीको छविमा आँच पुर्‍याएको बताएको छ ।

रास्वपा प्रवक्ता मुकुल ढकालद्वारा जारी विज्ञप्तिमा यो घटनाले विश्वसामु स्वाभिमानी नेपालीको शिर झुकाएको बताएका छन् ।

प्रवक्ता ढकालद्वारा जारी विज्ञप्तिमा भनिएको छ, ‘यस प्रकरणमा संलग्न जोसुकै भएपनि कुनै पनि हालतमा छाड्न हुँदैन भनी यसका घटनाक्रमलाई हामीले सुक्ष्म ढंगले नियालिरहेका छौं । हालसम्म सरकार र नेपाल प्रहरीले उठाएका कदमप्रति हाम्रो साथ, समर्थन व्यक्त गर्दछौं । यो प्रकरण केवल भ्रष्ट्राचारको मुद्दा होइन । एक सङ्गठित ठगी, राज्य विरुद्ध अपराध हो, राष्ट्रघाती कार्य हो ।’

यो मानव तस्करीको नविन रुप हो, ठगी हो तथा भ्रष्टाचारविरुद्धको संयुक्त राष्ट्र संघीय महासन्धि, अन्तरदेशीय संगठित अपराधविरुद्धको संयुक्त राष्ट्र संघीय महासन्धिलगायतका अन्तर्राष्ट्रिय सन्धि सम्झौता समेतको उल्लङ्घन भएको विज्ञप्तिमा उल्लेख गरेका छन् ।

उनले भने, ‘यस्ता अपराधलाई भ्रष्ट्राचारको रुपमा मात्र हेरिनु पर्याप्त हुँदैन । अतः यस प्रकरणका बहुआयामिक पक्षहरुलाई केलाई अनुसन्धानलाई सोही ढंगले अगाड बढाई दोषीलाई कडाभन्दा कडा कारवाही गर्न सरकारलाई खबरदारी गर्न चाहन्छौं ।’

यस्ता प्रकरणमा जोडिएका संदिग्ध व्यक्तिहरूको राहदानी तत्काल जफत गरी मुलुक बाहिर जानबाट रोक्न सरकासँग माग गरेको छ ।