अन्तर्राष्ट्रिय गिरोहको पासोमा नेपाली : टर्कीको खातामा लोभ्याउँदै ७३ लाख ठगी

काठमाडौं। गत चैत ५ गते ओमप्रसाद सुवेदी आत्तिँदै महाराजगन्जस्थित प्रहरीको केन्द्रीय अनुसन्धान ब्युरो (सीआईबी) पुगे ।

एक टर्किस नागरिकले आफूलाई ७२ लाख ९० हजार ४ सय २५ रुपैयाँ ठगेको उनको दाबी थियो। तर कहानी सामान्य थिएन। सुवेदीका अनुसार टर्किस नागरिक फुसुन तुम्साभासले आफू स्थानीय एक बैंकको कर्मचारी भएको परिचय दिएर उनलाई सम्पर्क गरेका थिए।

सुवेदीका आफन्त एड्रियन सुवेदीको सन् २०२० मा निधन भएको र उनको नाममा उक्त बैंकमा ९५ हजार अमेरिकी डलर रहेको जानकारी दिन सम्पर्क गरिएको थियो।

आफूले भनेअनुसार काम गरे ओमप्रसादले उक्त ९५ हजार अमेरिकी डलर प्राप्त गर्ने तुम्साभासले बताएकी थिइन्।

त्यसका लागि विश्वास दिलाउन ती टर्किस नागरिकले आफ्नो बैंक कर्मचारी परिचय पत्र र राहदानीको प्रतिलिपिसमेत दिलाइन्। तुम्साभासले एक कानुन व्यवसायीको सम्पर्क ठेगाना पनि उपलब्ध गराइन् र दुईजनाबीच कुराकानी हुने माहोल तय भयो।

प्रहरीमा ओमप्रसाद सुवेदीले दिएको जाहेरीअनुसार ती कानुन व्यवसायीको सल्लाहअनुसार ९५ हजार अमेरिकी डलर प्राप्त गर्ने लोभमा उनले ७२ लाख ९० हजार ४ सय २५ रुपैयाँ पठाएका थिए। सुवेदीलाई उपलब्ध गराइएका विभिन्न अकाउन्ट नम्बरमा ती रकम जम्मा गरिएको थियो। तर एकाएक तुम्साभास र ती कानुन व्यवसायी सम्पर्कबाहिर बनेपछि सुवेदी अत्तालिएका थिए। उनलाई लाग्यो( म ठगिएँ।

प्रहरीका अनुसार सुवेदीले विभिन्न ९ जना नेपालीका बैंक खातामा त्यो रकम जम्मा गरेका थिए। तीमध्ये लक्ष्मण नेपालीको बैंक खातामा १९ लाख ५३ हजार, मिथुन मन्डल खत्वेको खातामा २ लाख १९ हजार ४ सय २५, रेश्मा कुमारी रानाको खातामा ७ लाख ४० हजार, हरिषचन्द्र सिंहको खातामा ६ लाख ५० हजार, अन्जु थापाको खातामा ७ लाख ४० हजार, हिमाल आचार्यको खातामा २ लाख ६६ हजार, दीपक सापकोटाको खातामा १७ लाख ६ हजार, दिनेश चौधरीको खातामा २ लाख ६६ हजार र अशोक चौधरीको खातामा ७ लाख ४० हजार रुपैयाँ जम्मा गरेको पाइएको छ।

प्रहरीले यो घटनामा सप्तरीको राजविराजका ३४ वर्षीय महाविरप्रसाद शाह, कास्कीको माच्छापुच्छ्रेका २९ वर्षीय लक्ष्मण नेपाली, सप्तरीको राजविराजका ३० वर्षीय नविनकुमार चौधरी र मोरङको डाँगिहाटका ३० ३२ वर्षीय सन्तोष तामाङलाई पक्राउ गरेको छ। ८ जना फरार छन्।

‘हुन्डीको कारोबार गर्न नेपाली बैंक खाता खोल्न लगाएर पाकिस्तानीले फसाए’

प्रहरी अनुसन्धानका क्रममा पैसा जम्मा भएका बैंक खातावालाहरूलाई महावीरले सम्पर्कमा ल्याएको पाइएको छ।

महावीरले तीन महिनाअघि पाकिस्तानी नागरिक आदिलसँग फेसबुकमा चिनजान भएको र उनले हुन्डीको कारोबार गर्ने नेपाली बैंक खाता आवश्यक रहेको र त्यसबापत पैसा दिने बताएपछि आफू लोभिएको प्रहरीसँगको बयानमा उल्लेख गरेका छन्।

उनले यही कामका लागि आफू सप्तरीबाट काठमाडौं आएर पानी पोखरीस्थित एक हाउजिङमा तीन महिनादेखि बसिरहेको बताएका छन्।

उनले सुरुमा सन्तोष तामाङ र त्यसपछि लक्ष्मण नेपालीसँग भेटघाट गरी पाकिस्तानीको प्रस्तावबारे जानकारी गराएपछि लक्ष्मणले अन्य तीन जना नेपालीको खाता नम्बरसमेत उपलब्ध गराएको बताएका छन्।

बयानमा उनको दाबीअनुसार बैंक खाता खोलेपछि एटिएम, कनेक्ट आईपीएसका युजर नेम र पासवर्डसमेत आदिललाई पठाइएको थियो।

अनुसन्धानका क्रममा लक्ष्मणले आफ्नो खातामा जम्मा भएको सबै रकम महावीरको खातामा जम्मा गरेको देखिएको छ। आदिलले नै कोठा खोजेर काठमाडौंमा राखेको उनको दाबी छ।

राजविराजमा नविनसँग मिलेर होटल खोल्न लागेकाले २० दिनदेखि उनी आफूसँगै काठमाडौंमा आएर बसेको उनको भनाई छ। कतिपय बैंक खाता नम्बर आदिलले आफैले पठाइदिएको र खातामा जम्मा हुन आएको रकमहरू ती खातामा पठाउने गरेको पनि बयानका क्रममा बताएका छन्।

प्रहरी अनुसन्धानका क्रममा महावीर क्रिप्टो कारोबारीसमेत भएको खुलेको छ। महावीरले भने आफूले जम्मा भएको रकम पठाएपछि उनलाई प्रयोग गर्न आदिलले पठाएको बिनान्सको युजर आईडीमा क्रिप्टो जम्मा हुने गरेको र उक्त क्रिप्टो आफूले आदिलको युजर आईडीमा पठाउने गरेको दाबी गरेका छन्।