प्रदीप पौडेलको टिप्पणी- ओलीले पट्यारलाग्दो भाषण गर्नुभयो, आत्मसमीक्षा गर्नुभएन

काठमाडौं । नेपाली कांग्रेसका सांसद प्रदीप पौडेलले एमालेका अध्यक्ष केपी शर्मा ओलीले संसदमा पट्यारलाग्दो भाषण गरेको टिप्पणी गरेका छन् । आइतबार ओलीले सरकारले प्रस्तुत गरेको नीति तथा कार्यक्रममाथि छलफलको क्रममा दुई घण्टा बोलेका थिए ।

सोमबार प्रतिनिधिसभाको बैठकमा बोल्दै उनले भने, ‘पूर्वप्रधानमन्त्री केपी शर्मा ओलीले हिजो लामो पट्यारलाग्दो भाषण गर्नुभयो । यो पट्यारलाग्दो भाषणमा सधैंको जस्तो आत्मप्रचारको राग सुनियो । कहींकतै आत्मसमीक्षा गरिएको देखिएन । यस्तो प्रवृत्तिले लोकतन्त्रप्रति विश्वास बढाउँछ भन्ने मलाई लाग्दैन ।’

उनले सरकारले ल्याएको नीति तथा कार्यक्रमले जनतामा आशा जगाएको दाबी गरे । भ्रष्टाचारदेखि उच्चपदस्थ व्यक्तिको सम्पत्ति छानबिन अघि बढाउने कुरा राखेपछि सरकारप्रति जनताको आश बढेको सांसद पौडेलेको जिकिर थियो ।

सरकारले ल्याएको नीति तथा कार्यक्रम कार्यान्वयनमा लाग्नुपर्नेमा उनले जोड दिए ।

उनले ओलीलाई स्रोतको सुनिश्चितता नभएका आयोजनाहरूको फेहरिस्त संसदमा प्रस्तुत नगर्न आग्रहसमेत गरे ।