प्रेमिका अनुलाई समर्पित गर्दै नायक सविनले निकाले ‘तिमी टाढा’ बोलको म्युजिक भिडियो

काठमाडौं । नायक सविन श्रेष्ठको निर्देशनमा ‘तिमी टाढा’ बोलको म्युजिक भिडियो सार्वजनिक भएको छ । सबिनको यो डेब्यु निर्देशन हो ।

श्रेष्ठले यो गीत नायिका अनु शाहलाई समर्पित गरेर बनाएका हुन् । अनु र सविन रियल प्रेम जोडी हुन् । यो जोडी लामो समयदेखि प्रेममा छ । समयले साथ दिए यो जोडी अर्को वर्ष लगनगाँठो कस्ने तयारीमा छ ।

गीतमा सनिस श्रेष्ठको स्वर, लेखु सहयात्रीको संगीत तथा विषम आचार्यको एरेन्ज, मिक्सिङ र मास्टरिङ छ । भिडियोमा सविन र अनु नै फिचर्ड छन् । गोदावरीमा छायांकन गरिएको भिडियोमा सविन र अनुको खुलेको प्रेम देखाइएको छ ।

भिडियोमा चिरायु शाक्यको छायांकन, वीरबहादुर थारुको सम्पादन र कलर, कविराज गहतराजको कोरियोग्राफी छ । भिडियोका कार्यकारी निर्माता रविन आचार्य हुन् । भिडियो सविन श्रेष्ठ भ्लग्स च्यानलबाट सार्वजनिक गरिएको छ ।