समीक्षा अधिकारी : सुस्ताएको करिअरमा बहारको संकेत

काठमाडौं । कलिलै उमेरमा गायन क्षेत्रमा जमेकी गायिका हुन् समीक्षा अधिकारी । उमेरले बालिग पनि नभएकी उनमा गायन क्षेत्रका चर्चित अनि ठूला हस्तिलाई समेत टक्कर दिने आवाज अनि कला छ । तर, यतिबेला उनी कठीन समयबाट गुज्रिरहेकी छिन् ।

दुईवर्ष अघिसम्म समीक्षाको करिअरले लोभलाग्दो रुपमा उचाईं लिइरहेको थियो । मोस्ट डिमान्डेड गायिकामा पर्थिन् उनी । हरेक दिन गीत रेकर्डिङदेखि स्टेज शोसम्ममा भ्याइनभ्याइ हुन्थ्यो । स्कुल पढ्दै गरेकी किशोरीले ‘स्टार’को छवि बनाइसकेकी थिइन् ।

तर, निजी जीवनसँग जोडिएको एउटा स्क्यान्डलले गर्दा समीक्षाको करिअरमा धाँजा फाट्यो । उनी नराम्रोसँग विथोलिइन् । सामाजिक सञ्जालमा उनीविरुद्ध गालीका बौछार हुन थाले । सामान्य फोटो राख्दा पनि ‘रिप’ को बाढी लागिहाल्थ्यो । उनीसँग आँशु र पीडाबाहेक केही पनि थिएन । एकपटक त उनले अब बाँच्नै नसक्ने अवस्थामा पुगेको स्टाटससमेत लेखेकी थिइन् । पछि हटाइन् ।

त्यतिबेला समीक्षालाई साथ दिनेहरु निकै कम थिए । कलाकारितामा उनकै सहकर्मीहरु उनीसँग फोटो खिच्न डराउँथे । खिचे पनि सामाजिक सञ्जालमा हाल्दैनथे । समीक्षासँग फोटो हाल्दा उनीहरुले पनि गाली खानुपथ्र्यो । उनलाई गीत दिन कसैले हिम्मत नै गर्न छोडे । पहिले उनीसित काम गर्न कैँयौ दिन पर्खेर अपोईन्टमेन्ट लिने व्यक्तिहरु अब उनी देख्दा पनि भाग्ने भए । यसले गर्दा समीक्षा कामविहीन बनिन् ।

सँगै उदाएका गायिकाहरु देश-विदेशका कार्यक्रमहरुमा व्यस्त रहँदा समीक्षामा घरमै रोएर दिन काटिरहेकी थिइन् । कयौं दिनसम्म उनले गीत गाउन सकिनन् । फलतः करिअरमा ग्रहण लाग्यो ।

समीक्षाको जिन्दगी र करिअरले यसरी यु-टर्न लिनुको कारण थियो, उनले अभिनेता पल शाहविरुद्ध हालेको मुद्दा । जतिबेला पलविरुद्ध उनले अदालतको ढोका ढक्ढकाइन्, त्यसपछि उनका दुर्दिन सुरु भएका थिए । पलका समर्थकहरुले उनीमाथि सामाजिक सञ्जालमा निर्दयी आक्रमण गरे । उनले जाति गाली नेपालमा सायदै कुनै कलाकारले खाएका थिए । १७ वर्षको कलिलो उमेरमा उनीमाथि यस्तो प्रारब्ध आइलाग्यो कि उनले पटक–पटक हरेक खाइसकेकी थिइन् ।

अन्ततः समीक्षाले पलविरुद्धको मुद्दामा बयान फेरिन् । आफूले लगाएको सबै आरोप झूटा भएको भन्दै अदालतमा उनले ‘होस्टाइल’ बयान दिएपछि मुद्दाले पनि युटर्न लियो । पलले उन्मुक्ति पाए । समीक्षामाथिको हमला केही हदसम्म मत्थर भयो । संगीतमा फेरि सक्रिय हुन प्रयास गरिन् । यद्यपी, पलका समर्थकहरुको आक्रोश बाँकी नै थियो । एकपटक स्टेज शोकै क्रममा उनलाई ढुंगाले हानियो । चोट पनि लाग्यो । ब्याक स्टेजमा गएर रोइन् । तर, फेरि गायनलाई निरन्तरता दिइन् ।

केही समयअघि समीक्षा आफ्नी दिदीसँग अष्ट्रेलिया गइन् । अष्ट्रेलियामा दुई महिना बिताएर उनी हालै स्वदेश फर्केकी छन् । अहिले भने माहोल फेरिएको छ ।

अष्ट्रेलियाबाट फर्किएपछि उनले एउटा टेलिभिजनलाई अन्तरवर्ता दिइन्, जुन उनको पल शाह कन्ट्रोभर्सीपछिको पहिलो थियो । जब पहिलोपटक उनले आफ्ना मनका कुराहरु पोखिन्, धेरै मानिसहरुको सोच र उनीप्रतिको दृष्टिकोण बदलियो । सामाजिक सञ्जालमा कयौंले सहानुभूति व्यक्त गरे । उनीमाथिको गाली एकाएक साम्य भएको छ । समीक्षाको अनुहारमा मुस्कान फर्किएको छ ।

यससँगै समीक्षाको करिअरले पनि नयाँ गति लिने संकेतहरु देखिएका छन् । पहिलो उनीसँग फोटो खिच्न डराउन कलाकारहरु अहिले फेरि गीतको अफर लिएर आउन थालेका छन् । आखिर सबैले बलेको आगो नै ताप्ने हुन् । जे भए पनि समीक्षाको सुस्ताएको करिअरमा बहारको आशा पलाएको छ । अब उनी सबै भुलेर आफ्नो गायनमा फोकस्ड हुन चाहन्छिन् । यहीबीचमा भर्खरै प्लस टुको परीक्षा पनि सकाइन् ।

समीक्षाको जादुमयी स्वरका पारखीहरु धेरै छन् देशमा । उनको आवाजमा जुन मौलिकता छ, जुन गहिराई छ, त्यसले धेरै ठूलो ख्यातिको माग गर्छ । अब उनलाई खाँचो छ, एउटा सुपरहिट गीतको ।

‘माया मारेर…’ देखि ‘माया देकै हो…’ सम्म आइपुग्दा उनले आफूलाई प्रतिभाको खानीका रुपमा चिनाइसकेकी छन् । उनीसँग धेरै लामो सांगीतिक यात्रा बाँकी छ । उमेरले पनि त टिनएजर नै हुन् ।

एक वर्षसम्म मानसिक यातना भोगेकी समीक्षा अब पुरानै दैनिकीमा फर्केकी छन् । उनकोे हिजो एकै दिनमा चारवटा गीत रेकर्ड गराइन् । यसले पनि उनी फेरी डिमान्डेड बनेको संकेत गर्छ ।

पशुपति शर्मा, नरेश खातीजस्ता गायकहरुसँग उनले गीत रेकर्ड गराएकी छन् । भविष्यमा उनले गीतको छनोटमा भने धेरै ध्यान दिनुपर्ने छ । यसबीचमा अफर आएका जस्ता गीत पनि आउँदा उनलाई असफलताको ट्याग लागिरहेको छ ।

सबैभन्दा महत्वपूर्ण कुरा भनेको समिक्षालाई समाजले हेर्ने दृष्टिकोण बदलिएको छ । कम उमेरमै लभको चक्करमा पर्दा उनले निकै ठूलो सजाय भोग्नुपर्यो । यसबाट पाठ सिकेर उनले आफूलाई नयाँ शिराबाट अघि बढाइन् भने धेरैका निम्ति प्रेरणा बन्न सक्नेछिन् । अब उनले आफ्नो पढाइ र करिअरमा फोकस्ड हुनुपर्छ । प्रेम गर्नलाई समय धेरै बाँकी छ ।