तस्बिरमा हेर्नुस् नेपाल स्काउटको ७२औं स्थापना दिवस समारोह

काठमाडौं । नेपाल स्काउटले सोमबार ७२औं स्थापना दिवस मनाएको छ । वर्षेनी विशेष समारोह गरी नेपालमा स्थापना दिवस मनाइने गरिएको छ ।

कार्यक्रममा केन्द्रीय समिति संयोजक लोकबहादुर भण्डारीले प्रत्येक विद्यालयमा स्काउटलाई पुर्‍याउने योजनाअनुरूप यसको विस्तार भइरहेको बताए । उनले पालिकामा पनि स्काउटलाई सक्रिय बनाउँदै एक घर एक स्काउट स्वयंसेवी उत्पादन गर्ने लक्ष्य सुनाए ।

कार्यक्रममा स्काउटको अभियानमा संलग्न स्काउटर तथा लिडरहरूलाई विभिन्न सम्मान र पदवी वितरण गरिएको छ । पूर्वराष्ट्रपति विद्यादेवी भण्डारीको प्रमुख आतित्थ्यमा सम्पन्न स्थापना दिवस समारोहमा स्काउट स्वयंसेवकहरूले विभिन्न कलाकौशल साथै झाँकीहरू प्रदर्शन गरेका छन् ।

पूर्वराष्ट्रपति भण्डारीले नेपाल स्काउटले अन्तर्राष्ट्रिय स्तरमा उल्लेखनीय सफलता हात पारिरहेको भन्दै प्रशंसा गरेकी छन् । उनले नेपाल स्काउटले दक्षिण एशियामा स्काउटमा सबैभन्दा बढी सदस्यता लिनसक्नु साथै अन्तर्राष्ट्रिय स्काउटका कार्यक्रमहरू नेपालमा सञ्चालन गर्नुले पनि स्काउटले राम्रा काम गरिहेको प्रमाणित हुने बताइन् ।

भण्डारीले भनिन्, ‘कोभिड १९ को महामारीमा पनि नेपाल स्काउटले उल्लेखनीय भूमिका खेलेको छ । देशमा आइपर्ने प्राकृतिक एवं अन्य विपद्को समयमा विपद् व्यवस्थापन र प्रभावितहरुको उद्धार कार्यमा पनि नेपाल स्काउट सदैव अग्रमोर्चामा रहँदै आएको छ । सातै प्रदेशमा विपद् व्यवस्थापन टोली खटाइ स्काउट परिचालन भएको थाहा पाउँदा खुशी लागेको छ ।’