रामेश्वर थापालाई निजी हेलिपोर्ट बनाउन दिने मन्त्री किरातीको निर्णयमा क्यानको विमति

काठमाडौं । काभ्रेमा सिम्रिक एयरलाई हेलिपोर्ट बनाउन दिन पर्यटनमन्त्री सुदन किरातीले गरेको निर्णय नेपाल नागरिक उड्डयन प्राधिकरणका महानिर्देशक प्रदीप अधिकारीले विमति राखेका छन् ।

प्राधिकरणले पत्र पठाएर हेलिपोर्ट बनाउनु प्राविधिक तथा कानूनविपरीत भएकोले कार्यान्वयन गर्न नसकिने बताएको छ ।

‘ऐनमा कुनै पनि विमानस्थल वा हेलिपोर्ट निजी जग्गामा निर्माण गर्न दिने कुरा परिकल्पनासमेत गरिएको छैन । विमानस्थल वा हेलिपोर्ट भनेको संवेदनशील विषय हो । विश्वभर नै सरकारी जग्गामा विमानस्थल वा हेलिपोर्ट निर्माण भएर संचालनका लागि मात्रै निजी क्षेत्रलाई दिने चलन छ,’ क्यानको पत्रमा उल्लेख छ ।

हाल प्राधिकरणले भक्तपुरको नलिञ्चोकमा १५ करोड खर्च गरेर २७ वटा हेलिकोप्टर उडान तथा अवतरण हुन सक्ने गरी हेलिपोर्ट बनाइरहेको छ ।

व्यवसायी क्याप्टेन रामेश्वर थापाको निजी हवाई सेवा प्रदायक कम्पनी सिम्रिक एयरलाई काभ्रेपलाञ्चोक जिल्लाको बनेपा नगरपालिका- १४, राउतगाउँको माथिल्लो भाग इटापु डाँडामा हेलिपोर्ट निर्माण गर्न मन्त्री किरातीले जेठ २२ मा सैद्धान्तिक सहमति दिएका थिए । मन्त्रीले सहमतीबारे क्यानलाई २८ गते पत्रमार्फत् जानकारी गराएको थियो ।

हिजोमात्र महानिर्देशक अधिकारीलाई मन्त्री किरातीले ७ दिनको अल्टिमेटम दिएर ९ बुँदे स्पष्टीकरण सोधेका थिए ।

अधिकारीले भने आफूलाई क्याबिनेटले नियुक्त गरेको भन्दै विधि प्रक्रिया अनुसार गोप्यरूपमा सोध्नुपर्ने स्पष्टीकरण फेसबुकमा पोष्ट गरेकाले जवाफ नफर्काउने अडान लिएका थिए ।