लोकतन्त्र बलियो बनाउन राजनीतिक दलहरु प्रतिवद्ध हुन सकेनन्ः अग्नि सापकोटा (भिडिओ)

काठमाडौं । पूर्वसभामुख अगिनप्रसाद सापकोटाले नेपालका राजनीतिक दलहरुमा लोकतन्त्रको कमी भएको बताएका छन् । ६५ औं संसद दिवसको अवसर पारेर शनिवार काठमाडौंमा आयोजित कार्यक्रमलाई सम्बोधन गर्दै उनले यस्तो बताएका हुन् ।

उनले अहिले पार्टीभित्र विचौलिया, माफिया मात्रै नभइ एकअर्कालाई आरेप लगाएरु मूल्य, मान्यता र आदर्शमाथि नै प्रहार भइरहेको बताए ।
उनले लोकतन्त्र बलियो बनाउका लागि नेपालका राजनीतिक दलहरु प्रतिवद्ध हुन नसकेको बताए ।

उनले भने, ‘कमिसन, अहिले विचौलिया, माफियाहरुको मात्रै होइन, पार्टीभित्र पनि एक अर्कालाई आरोप लगाएर के हो त्यो पार्टीको मूल्य मान्यता, आदर्श, हामी कतातिर गइरहेका छौँ । अहिले पार्टीभित्र केही कुराको कमी छ भने, हाम्रो राजनीतिक जीवनका हरेक क्षेत्रमा केही कुराको कमी छ भने त्यो लोकतन्त्रको कमी छ । लोकतन्त्र भनेको कुनै प्रवचनको विषय होइन । लोकतन्त्र भनेको कुनै भाषणको विषय होइन । लोकतन्त्र भनेको जीवन व्यवहार हो, नयाँ सभ्यता र संस्कृति हो । लोकतन्त्र भनेको हामीलाई अघि बढाउने महान सिद्धान्त हो । त्यसका लागि पार्टीहरु प्रतिवद्ध भएको मैले देखिनँ ।’

पूर्वसभामुख सापकोटाले कुनैपनि लाभका लागि सिद्धान्तको बली चढाउनु निर्लज्जताको कुरा भएको बताए । उनले पछिल्लो समय राजनीतिक सिद्धान्तमा पनि विचलन भइरहेको बताए ।