कपडा धुन बिजुली जाँदा विद्युत प्राधिकरणका कर्मचारीले लन्ड्री सञ्चालकलाई गरे हातपात

काठमाडौं । काठमाडौंको शान्तिनगरस्थित एक लन्ड्रीका सञ्चालकले कपडा धुने विषयमा नेपाल विद्युत प्राधिकरणका कर्मचारीले हातपात गरेको भन्दै प्रहरीमा उजुरी गरेका छन् ।

वासमान्डु लन्ड्रीका सञ्चालक रवीन्द्र सिजापतीले प्राधिकरणका कर्मचारी धर्मराज खातीले आफूलाई हातपात गरेको बताए ।

‘आज बिहान उहाँ कपडा लिएर आउनुभएको थियो । मैले लाइन काटिएको छ, अहिले मिल्दैन भनें । उहाँले बिजुलीको पैसा तिरेको छैन होला काट्यो नि भन्नुभयो’, रवीन्द्रले भने, ‘त्यसपछि मैले तपाईं पनि काम गर्ने मान्छे हो गर हेर्नु न भन्दा मलाई काम गर्ने मान्छे भन्ने, म हाकिम हुँ भन्दै तँ तँ र म म गर्नुभयो । त्यसपछि मैले पनि तँ भन्दा उहाँ मेरो घाँटी समाउन आइपुग्नु भयो । तीनचार पटक घाँटी समाउनुभयो ।’

उनले यसअघि पनि खाती कपडा लिएर आउने र कामदारलाई थोरै पैसा दिएर काम गरेर जाने गरेको बताए । ‘लाइन नै काटिएपछि मैले कसरी काम गर्नू’, उनले भने ।

आरोपित धर्मराजले भने टेलिफोनमा धेरै नबोल्ने भन्दै कुरा गर्ने भए प्रहरी चौकी आउन भने । रवीन्द्रले भने घाँटीमा समाउँदा चोट लागेको भन्दै कुटपिटको उजुरी गरेका छन् ।