एसेस टेस्ट शृखलाको तेस्रो खेलमा अस्ट्रेलियामाथि इङ्ग्ल्याण्डको रोमान्चक जीत

काठमाडौं । एसेस टेस्ट शृंखलाअन्तर्गत तेस्रो खेलमा इङ्ग्ल्याण्डले अस्ट्रेलियालाई ३ विकेटले हराएको छ । लिड्समा भएको खेलमा २५१ रनको लक्ष्य इङ्ल्यान्डले चौथो दिन ७ विकेट गुमाएर पुरा गर्यो ।

इङ्ग्ल्याण्डका लागि ह्यारी ब्रुकले सर्वाधिक ७५ रन जोडे । जक क्रलीले ४४, क्रिस वोक्सले ३२ र बेन डकेटले २३ रन बनाए। त्यसअघि इङ्ल्यान्डले पहिलो पालीमा २३७ रन जोडेको थियो ।

पहिलो पालीमा २६ रनको अग्रता लिएको अस्ट्रेलिया दोस्रो पालीमा २ सय २४ रनमा समेटिएको थियो । अस्ट्रेलियालाई सस्तोमा समेट्न स्टुवार्ट ब्रोड र वोक्सले तीन तीन तथा मार्क उड र मोइन अलीले दुई दुई विकेट हात पारे । शृंखलाका अघिल्ला दुवै खेल अस्ट्रेलियाले जितेको थियो । यो शृखला ५ खेलको रहेको छ ।