आजबाट आईपीओ बिक्री खुला गरेको कुथेली बुखरी स्मल हाइड्रोपावर कस्तो कम्पनी हो, आवेदन दिन के गर्ने ?

काठमाडौ । कुथेली बुखरी स्मल हाइड्रोपावरको आईपीओ आज मंगलबार (असार २६ गते) देखि बिक्री खुला भएको छ । यस कम्पनीले १ करोड २१ लाख ८६ हजार ८०० रुपैयाँ बराबरकोआईपीओ बिक्रीमा ल्याएको हो । यो कम्पनीको १ सय अंकित मूल्यमा १ लाख २१ हजार ८६८ कित्ता सेयर निष्कासन खुला भएको हो ।

वैदेशिक रोजगारीमा रहेका नेपाली, सामूहिक लगानी कोष र कर्मचारीलाई सेयर छुट्याएर बाँकी रहेको १ लाख १ हजार १५१ सय कित्तामा सर्वसाधारणले आवेदन दिन सक्नेछन् । यसमा असार २९ गतेसम्म आवेदन दिन सकिनेछ । सो अवधिमा सबै सेयर बिक्री नभएमा साउन ९ गतेसम्म आवेदन दिन पाइनेछ ।

लगानीकर्ताले यसमा न्यूनतम १० कित्तादेखि अधिकतम १ हजार कित्ताको लागि आवेदन दिन सक्नेछन् । रेटिङ एजेन्सी इक्रा नेपालले कुथेली बुखरी स्मल हाइड्रोपावरको आइपीओलाई इक्रा एनपी इस्यूअर रेटिङ्ग त्रिपल बी माइनस रेटिङ्ग प्रदान गरेको छ । जसले कम्पनीको दायित्व बहन गर्ने क्षमतामा मध्यम जोखिम रहेको संकेत गर्छ ।

गत वर्ष १९.७४ रुपैयाँ प्रतिसेयर आम्दानी रहेको यस कम्पनीको चालु आर्थिक वर्षको चैत मसान्तसम्म १३.८८ रुपैयाँ रहेको छ । आर्थिक वर्षको अन्त्यसम्म १५.२३ रुपैयाँ पुग्ने प्रक्षेपण कम्पनीले गरेको छ । यो वर्ष ७ करोड ६३ लाख रुपैयाँ सञ्चित नाफा गर्ने प्रक्षेपण कम्पनीको छ ।

९९८ किलोवाट क्षमताको यो हाइड्रोपावरको लागत २४ करोड ७५ लाख रुपैयाँ लाग्ने अनुमान छ । ९.३७ वर्षपछि सर्वसाधारणको लगानी फिर्ता हुने बताइएको छ । यस कम्पनीको रजिष्टर्ड कार्यालय काठमाडौं जिल्ला, का.म.न.पा. वडा नं. १० मा रहेको छ । आयोजनाको शतप्रतिशत निर्माण कार्य सम्पन्न भई २०७२÷०६÷०३ गतेदेखि व्यापारिक उत्पादन सुरु गरेर नेपाल विद्युत प्राधिकरणको ३३ के.भि. प्रसारण लाइनबाट विद्युत बिक्री गरिरहेको कम्पनीको विवरणपत्रमा उल्लेख छ । हाल कम्पनीको संस्थापकहरुबाट चुक्ता पूँजी ९ करोड चौहत्तर लाख चौरानब्बे हजार रहेको छ । सबै सेयर बाँडफाँट भएपछि कम्पनीको चुक्तापुँजी १२ करोड अठार लाख सत्सठ्ठी हजार पाँच सय रुपैयाँ हुनेछ ।