राप्रपाको लक्ष्य- छोराछोरी पुस्तालाई पार्टीमा जोड्दै एकवर्षमा दुई लाख सक्रिय सदस्य पुर्‍याउने (भिडिओ)

काठमाडौं । राष्ट्रिय प्रजातन्त्र पार्टी (राप्रपा)ले ‘राप्रपाः अब नवीन राप्रपा’ कार्ययोजना २०८० सार्वजनिक गरेको छ । अध्यक्ष राजेन्द्र लिङ्देनले पार्टी केन्द्रीय कार्यालयमा पत्रकार सम्मेलन गरि कार्ययोजना सार्वजनिक गरेका हुन् ।

राप्रपाले ६ महिना भित्रमा पार्टीको सबै तहमा ३३ प्रतिशत महिलाको संख्या सुनिश्चित गर्ने, पार्टीको सबै तहमा ४० वर्षसम्मका युवाहरूको अनिवार्य सहभागिताको व्यवस्था मिलाउन केन्द्रीय कार्यसमितिमा ४० तथा कार्यसम्पादन समितिमा कम्तिमा ७ जना विभिन्न प्रक्रियाबाट अनिवार्य ४० वर्षसम्मका युवाहरूको प्रतिनिधित्व गराईने बताए ।

पार्टीले आगामी दिनमा विभिन्न तहमा उम्मेद्वार बनाउँदा ५० प्रतिशत प्राइमरी छनौट प्रक्रिया अपनाइने, केन्द्र, प्रदेश, जिल्ला स्तरीय नेता तथा जनवर्गीय संगठनका प्रतिनिधिहरू समेत गरेर करिब ९ सय जना नेताहरूलाई एकैसाथ संगठन विस्तारका लागि भूगोल केन्द्रीत जिम्मेवारी प्रदान गरिएका बताए ।

उनले भने, ‘एकैसाथ ७५३ वटै स्थानीय तह र ६७४३ वटै वडा तथा प्रवासमा समेत यो जिम्मेवारी तोकिएको छ। यसरी भूगोलमा जिम्मेवारी प्राप्त नेताहरूले आफूलाई तोकिएको भूगोलमा ६ महिनासम्म तोकिए अनुसारको संगठन विस्तार र सुदृढिकरणका काम हुन्छ । यसले राजसंस्था, हिन्दुराष्ट्र र संघीयता सम्बन्धित पार्टीको अवधारणालाई जनसमक्ष पुर्‍याउन सहयोग पुग्छ ।’

राप्रपाले भ्रष्टाचार र भ्रष्टाचारका विरुद्ध पार्टीको अवधारणालाई प्राथमिकताका साथ राख्ने योजना बनाएको छ ।
यस्तै, पार्टी प्रवेश तथा छोराछोरी पुस्तालाई पार्टीमा जोड्नेदेखि अब काम नगरि नेता हुन नपाईने व्यवस्था गरेको छ ।

विद्युतीय माध्यमबाटै साधारण, सक्रिय सदस्य बन्न साथै आर्थिक सहयोग पनि गर्न सकिने व्यवस्था गर्दै एकवर्ष भित्रमा सक्रिय सदस्य संख्या दुई लाख पुर्याइने लक्ष्य लिएको छ ।