इन्टर मियामीमा मेसीले १० नम्बर जर्सी लगाउने, २० हजार दर्शकसामु गर्‍यो क्लबले सार्वजनिक

न्युयोर्क। अर्जेन्टिनी स्टार फुटबलर लियोनल मेसीले अमेरिकी मेजर लिग सकर (एमएलएस) क्लब इन्टर मियामीमा १० नम्बर जर्सी लगाउने भएका छन्।

क्लबले करिब २० हजार दर्शकमाझ मेसीलाई सार्वजनिक गरेको छ।

आफूलाई हेर्न आएका दर्शकलाई ३६ वर्षीय मेसीले धन्यवाद दिएका थिए। उनले आफ्नो पुरानै चाहना इन्टर मियामीमा पनि कायम रहने पनि बताए।

यसअघि बार्सिलोनाबाट पेरिस सेन्ट जर्मन (पीएसजी)मा आबद्ध भएपछि मेसीले त्यहाँ ३० नम्बरको जर्सी लगाएका थिए। त्यसअघि उनले बार्सिलोनामा १० नम्बर जर्सी लगाएका थिए।

मेसीलाई इन्टर मियामीले सार्वजनिक गरिरहँदा ‘अमेरिकाको नम्बर १०, विश्वको सर्वोत्कृष्ट नम्बर १०’ भनेर सम्बोधन गरिएको थियो।

‘म प्रतिस्पर्धा गर्न प्रशिक्षण सुरु गर्न चाहन्छु। प्रतिस्पर्धा गर्न, उपाधि जित्न र क्लबलाई विकाश गर्न चाहने मेरो इच्छा यहाँ पनि कायमै रहने छ, दर्शकसामु मेसीले भने।