कर्णालीलाई गलत राजनीतिले पछाडि पारियो, रास्वपाले राष्ट्रिय मुद्दा बनाउनेछ : रवि लामिछाने

काठमाडौं । राष्ट्रिय स्वतन्त्र पार्टी (रास्वपा) सभापति रवि लामिछानेले कर्णालीका मुद्दालाई राष्ट्रिय मुद्दा बनाइने बताएका छन् ।

कर्णालीका विभिन्न जिल्लाबाट आएर काठमाडौँ बसिरहेका कर्णालीवासीसँग सोमबार छलफल गर्दै उनले कर्णालीमा सम्भावना हुँदाहुँदै पनि गलत राजनीतिक अभ्यासले पछाडि पारिएको बताएका हुन् ।

प्रतिनिधिसभा सदस्यसमेत रहेका उनले अब कर्णाली मात्रै होइन देशका कुनै पनि ठाउँ पछाडि पर्न नहुने बताए ।

छलफलमा रास्वपा उपसभापति डीपी अर्यालले देश निर्माणका लागि रास्वपाको जन्म भएको बताए । देशमा भइरहेको बेथिति नियन्त्रणका लागि आम नागरिक पनि चनाखो हुनुपर्ने उनको भनाइ छ ।

सांसद समेत रहेका अर्यालले कर्णालीवासीसँग देश निर्माणको अभियानमा जुट्न आग्रह गरे ।

सांसद बिनिता कठायतले कर्णालीले भोगेका पीडा र समस्यालाई सदनसम्म पुर्याइरहेको बताइन् ।

‘अबको आशा, भरोसा भनेकै रास्वपा हो,’ उनले भनिन्, ‘देश निर्माण अभियानमा हामी सबैको हातेमालो जरुरी छ ।’