कालीमाटी तरकारी बजारका सटर सेटिङमा भाडा लाउन थालेपछि विरोध (भिडिओ)

काठमाडौं । कालीमाटी तरकारी बजारका सटरहरू विनाप्रतिस्पर्धा भाडामा दिने सम्झौता खारेज गर्नुपर्ने भन्दै राष्ट्रिय किसान सञ्जालले कालीमाटी तरकारी बजार विकास समितिको कार्यालय धर्ना दिएका छन्

बजारका सटर र स्टलहरु खुल्ला प्रतिष्पर्धामार्फत भाडामा लगाउनुपर्ने र विनाप्रतिष्पर्धा भाडामा दिने सम्झौता खारेज गर्नुपर्ने भन्दै किसान सञ्जालका सदस्यले धर्ना दिएका हुन् । सञ्जालले बजारका ५० प्रतिशत सटर र स्टलहरू उत्पादक किसानलाई सहुलीयत दरमा छुट्टाउनुपर्ने, बजार विकास समितिमा ५० प्रतिशत किसान प्रतिनिधि सुनिश्चित हुनुपर्ने माग पनि अघि सारेको छ ।

किसान र उपभोक्ता हितविरोधी निर्णय खारेज गर्नुपर्नेलगायतका माग राख्दै विगत चार दिनदेखि निरन्तर समितिको कार्यालय धर्ना दिइएको अखिल नेपाल किसान महासंघका महासचिव बाबुराम थापाले बताए ।

समितिले गरेको निर्णय फिर्ता नगरेसम्म धर्ना जारी रहने सञ्जालले जनाएको छ । यस्तै सञ्जालले लम्पी स्किन रोगबाट पशु क्षति भएको, पशु बीमाको रकम नपाएको, तरकारी उत्पादक किसानले उचित मूल्य नपाएको भन्दै थप देशव्यापी आन्दोलन सुरू गरेको समेत जनाएको छ ।