कांग्रेस ४ वटा मन्त्री लिएर साना पार्टीको पछि लागुन्जेल पुच्छरले कुकुर हल्लाइ रहन्छ : ओली (भिडिओ)

काठमाडौं । नेकपा एमालेका अध्यक्ष केपी शर्मा ओलीले कांग्रेसले आत्मबल गुमाई सकेको भन्दै देशको नेतृत्व गर्न सक्छु भन्ने आँट नै उसमा नरहेको टिप्पणी गरेका छन् ।

गुरु लुइँटेल विकास तथा अध्ययन प्रतिष्ठानले शनिवार काठमाडौंमा आयोजना गरेको कार्यक्रममा अध्यक्ष ओलीले ८९ सीटको कांग्रेसलाई ३२ सीटको माओवादीले फनफनी आफ्नो पछि घुमाइरहेको बताए ।

ओलीले भने- कुकुरले पुच्छर हल्लाउँछ कि पुच्छरले कुकुर भनेर उहिले २०१५ सालको संसदमा केदारमान व्यथितले प्रश्न गर्नुभएको थियो । यही प्रश्न म आज कांग्रेसका साथीहरूलाई गर्न चाहन्छु । उहाँहरूले कसको पछाडि आफूलाई लाउनुभएको हो ? के का पछि उहाँहरू लाग्नुभएको हो ? अचम्म लाग्छ,पछाडि पुच्छर चुप लागेर बसेको छ,अगाडि कांग्रेस डोलायमान छ । तन डोले मन डोल जस्तो गीत गाएर बसेको छ । तपाईँहरूलाई यसै गरी ४ वटा मन्त्री लिएर साना पार्टीको पछि लाग्ने मन लागिन्जेल लाग्नुस् ।

ओलीले सुन तस्करीमा सरकारको संलग्नता भएकै कारण उच्चस्तरीय निष्पक्ष आयोग बनाउन नमानेर आफैँ छानबिन गर्छौँ भनिरहेको आरोप लगाए ।