‘जुलेबी’ प्रती आशावादी रहेका ‘होस्टेल रिटर्नस्’ डेब्यू अभिनेता सुशील सिटौला

काठमाडौं। ‘होस्टेल रिटर्नस्’ डेब्यू अभिनेता सुशील सिटौला नयाँ चलचित्र लिएर पुन दर्शकमाझ आउँदैछन् । उनको अभिनय रहेको चलचित्र ‘जुलेबी’ यहीँ शुक्रबारबाट प्रदर्शनमा आउँदैछ ।

चलचित्रको मुख्य भूमिकामा ७ पात्रहरु छन जहाँ सबैको आ-आफ्नै विगतको कथा देखाईएको छ। चलचित्रमा सबैको आ-आफ्नै चाहना छन् । रत्नपार्कबाट सबै पात्रहरु जोडिन्छन् भने चलचित्रको अधिकांश छायाँकन पनि रत्नपार्कमै गरिएको हो ।

चलचित्रलाई लिएर निकै आशावादी छन् सुशील। चलचित्र हेरिरहँदा त्यहाँका पात्रलाई कतिपय दर्शकले आफ्नो जीवनसँग रिलेट गर्न सक्नेमा सुशील ढुक्क छन् । चलचित्रमा डोटीबाट काठमाडौं आएको ‘छमान’ नामक पात्रको भूमिकामा देखिएका छन् उनी । ‘रत्नपार्कमा भिडभाड देख्छौं। कसैले कसैलाई चिन्दैनौं। त्यही रत्नपार्क हुँदै ओहोरदोहोर गर्ने, बागबजारमा काम गर्ने केटा हो जसले आफ्नै फरक कथा बोकेर आएको छ’ सुशील चलचित्रमा आफ्नो भूमिकाबारे प्रष्टयाउँछन् । ‘यो एउटा आशालाग्दो कथा हो । मायाको कथा हो । तृष्णाको कथा हो’ सुशील चलचित्रबारे आशावादी हुँदै सुनाउँछन् ‘बिल्कुलै नयाँ कथामा अग्र्यानिक खालको चलचित्र बनेको छ । दर्शकले रुचाउने विस्वस्त छु ।’

चलचित्रलाई निर्देशक गणेशदेव पाण्डेले निर्देशन गरेका हुन्। सुशीलले गणेशदेवको यसअघिको चलचित्र ‘गाँजाबाजा’मा पनि काम गरिसकेका छन । यसअघि सुशीललाई अफर आएका चलचित्रहरुमा आफ्नो क्यारेक्टर सबै उस्तै -उस्तै भएकाले उनले ती चलचित्र छाडेका थिए। यो चलचित्रमा भने फरकपना पाएकाले आफू जोडिएको उनको दाबी छ। ‘उहाँले चलचित्रबारे कुरा गर्न बोलाउनुभयो। जब मेरो क्यारेक्टरबारे सुने, बिल्कुलै फरक लाग्यो। मनमा किन नगर्ने ? भन्ने भयो। अनि चलचित्र गर्न राजी भए, उनी भन्छन् ‘नेपाली फिल्ममा मलाई अहिलेसम्म नदेख्नुभएको क्यारेक्टर यसमा देख्नुहुनेछ।’

यस चलचित्रको छायांकन भने भिन्न तरिकाले गरिएको छ। रत्नपार्कमा उपस्थित मानिसहरुले सुटिङ भैरहेको खासै पत्तो पाएनन् । कलाकारहरु निश्चिल ठाउँमा गएर उभिन्थे अनि निर्माण टिमको एकजनाले साइडबाट एक्सन भनेर क्रस हुन्थे । टाढाबाट क्यामेराले खिचिरहेको हुन्थ्यो ।

छायांकनको भिन्न तरिकाले भए पनि काम गर्दाका अनुभव भने रोचक रहेको सुशिल बताउँछन् । ‘जुलेबी’मा सुशीलका अलावा सुरक्षा पन्त, उषा रजक, नीशा अधिकारी, पुश्कर कार्की, तुफान थापा, मोनिका थापा लगायतको अभिनय छ । सबै कलाकारहरुले चलचित्रमा राम्रो अभिनय गरेको सुशील बताउँछन् ।

उनले भने ‘चलचित्रको टिजर र ट्रेलरलाई लिएर दर्शकहरुबाट सकारात्मक प्रतिक्रिया मिलिरहेको छ। नयाँ स्वादको चलचित्र आएको भन्दै दर्शकले रुचि देखाएका छन्। अब व्यापार कस्तो गर्ने हो ? त्यसका लागि भने केही दिन कुर्नुपर्ने छ,’ उनी थप्छन् ,‘मुख्य भनेको दर्शक हो । चलचित्र उहाँहरुलाई मन पर्नुपर्यो । कतिपय चलचित्रले सुरुवाती दिनमा राम्रो नगर्न पनि सक्छन। प्रदर्शनमा आइसकेपछि माउथ पब्लिसिटीका कारण चलचित्र राम्रो चल्न नि सक्छ। ‘जुलेबी’को सन्दर्भमा पनि राम्रो हुने भाइब्स आइरहेको छ।’आभा नेपाल निर्माता रहेको यो चलचित्रलाई विवेक खड्काले छायांकन र अञ्जय खड्काले सम्पादन गरेका हुन् ।