अरू खेलले तत्काल विश्वकप खेल्ने सम्भावना छैन, क्रिकेटमा लगानी बढाऔँ – अध्यक्ष चन्द

कैलाली । नेपाल क्रिकेट संघ क्यानका अध्यक्ष चतुर बहादुर चन्दले नेपाली खेलकुदमध्ये सबैभन्दा धेरै लगानी क्रिकेटमा लगाउन आवश्यक रहेको बताएका छन् ।

शनिबार धनगढीमा सुदूरपश्चिम प्रादेशिक क्रिकेट सङ्घको साधारण सभामा बोल्दै चन्दले क्रिकेटले मात्रै तत्काल विश्वकप खेल्न सम्भव भएको हुँदा सरकारले लगानी बढाउनु पर्ने बताए ।

उनले नेपाली क्रिकेटलाई विश्वले चिनिसकेकाले भन्दै आगामी दिनमा खेल उत्कृष्ट बनाउनको लागि लगानी बढाउनु पर्ने बताए ।

उनले भने, ‘नेपालप्रति आईसीसी अत्यन्तै सकारात्मक र नेपाली क्रिकेटको क्रेजलाई नजिकबाट नियालिरहेको छ त्यसैले यो स्वर्णिम अवसरलाई समयमै हामीले सदुपयोग गर्नुपर्ने र अबको समय भौतिक पूर्वाधारमा लगाउनुपर्ने छ ।’

सन २०२४ मा अमेरिका र वेस्टइण्डिजमा संयुक्त रूपमा आयोजना हुने टी- ट्वाण्टी विश्वकप एसिया क्वालिफायरको आयोजना गर्ने जिम्मा नेपाललाई दिनु, सन २०२७ मा यु–१७ महिला विश्वकपको सह आयोजक नेपाललाई बनाइनुले पनि नेपालको गरिमा बढेको अध्यक्ष चन्दको भनाइ छ ।

नेपालमा क्रिकेट क्रेज देखेर विश्वका अधिकांश देशहरू नेपाल आउन चाहेपनी सुरक्षा सहितको स्टेडियम बनाउन नसक्दा त्यो सम्भव नभएको उनले दाबी गरे ।

चन्दले खेल पर्यटनबाट अरबौँ कमाउने सक्ने सम्भावना हुँदा हुँदै पनि सरकारले कुल बजेटको ५ प्रतिशत मात्रै खेलकुदमा राखेर विभेद गरिरहेको बताए ।
उनले पुनः आफू क्यानको नेतृत्वमा आए प्रधानमन्त्री, खेलकुद मन्त्री, मूलधारका राजनीतिक दलका नेतालाई पूर्वाधार विकासमा लगानी बढाउन माग गर्ने बताए ।

सुदूरपश्चिम सरकारका भौतिक पूर्वाधार मन्त्री प्रकाश देउवालाई फाप्ला खेल ग्राममा केन्द्र सरकारले ढिलाइ गरे प्रदेश सरकारले बनाउन इच्छुक हुनुपर्ने समेत बताए ।

उनले मन्त्री देउवालाई एक वर्षमा सम्भव नभए ३÷४ वर्षको अवधिमा फाप्ला मैदानलाई बनाएर सुदूरपश्चिममा क्रिकेट विकासलाई अझै अगाडी बढाउन सकिने बताएका थिए ।