निजामती सेवा पुरस्कारका लागि मंगलबारभित्र सिफारिस गरिसक्न सबै निकायलाई परिपत्र

काठमाडौं । निजामती सेवा पुरस्कारका लागि सिफारिस गर्दा अपनाउनुपर्ने कार्यविधि र निजामती सेवा पुरस्कार सिफारिस सम्बन्धी आधारभित्र रहेर मंगलबारसम्म पठाउन सरकारले सबै निकायलाई परिपत्र गरेको छ ।

संघीय मामिला तथा सामान्य प्रशासन मन्त्रालयले सबै मन्त्रालय, सचिवालय, अदालत, आयोग र कार्यालयलाई परिपत्र गर्दै सन्तुलित रुपमा छनौट गरेर मन्त्रालयमा रहेको सचिवालयमा मंगलबारसम्म आइपुग्नेगरी सिफारिस गरेर पठाउन परिपत्र गरेको हो ।

निजामती सेवा नियमावली, २०५० को नियम ११६ को क दुई बमोजिम मूख्यसचिव डा.बैकुण्ठ अर्यालयको अध्यक्षतामा गठित निजामती सेवा पुरस्कार सिफारिस समितिको साउन ३१ गते बसेको बैठकले यस्तो निर्णय गरेको हो । निजामती सेवा पुरस्कारका लागि सरकारले यस अघि नै सिफारिस माग गरिसकेको र कतिपय निकायबाट अहिलेसम्म पनि सफारिस नआएको तथा केहि निकायबाट सिफारिस भइसकेको विवरण अध्ययन गर्दा निर्धारित ढाँँचामा सिफारिस नभएको पनि मन्त्रालयले जनाएको छ ।

सरकारले प्रत्येक वर्ष निजामती सेवा दिवसका अवसरमा निजामती सेवा नियमावली, २०५० मा उल्लेख भए अनुसार निजमती सेवा पुरस्कार प्रदान गर्दै आएको छ ।