साहित्यकार तुल्सी थापाको निधन

हेटौँडा । नाटक, कविता तथा कथाको क्षेत्र मार्फत राष्ट्रिय स्तरमा ख्याती कमाएका साहित्यकार तुल्सी थापाको निधन भएको छ । मकवानपुरको हेटौँडा निवासी ७८ वर्षीय थापाको चितवनको पुरानो मेडिकल कलेजमा उपचारको क्रममा निधन भएको हो ।

मुटु, मधुमेह सहितको समस्या भएको थापा केहिदिनबाट निमोनियाको उपचारको क्रममा भरतपुरमा थिए । थापाको शुक्रबार बिहान निधन भएको पारिवारिक श्रोतले जनाएको छ ।

नेपाली कविताको क्षेत्रमा ‘दाना कविता’ को सुरुवात गरेका थापाले दाना कविता संग्रह अन्तर्गत २०५८ सालामा ‘एक निमेष अनन्तको’ प्रकाशन गरेका थिए । कवितासँगै नाटक तथा कथा विधामा समेत राम्रो दख्खल राख्ने थापाको ‘अमरसिंहको खोजिमा’ नाटक संग्रह निकै चर्चित नाटक संग्रह हो ।

उक्त नाटक देशभरका नाटकघरमा मञ्चन भैसकेको छ । यस बाहेक उनले २०७२ सालमा ‘फरक आकाश’ कथा संग्रह समेत प्रकाशित गरेका थिए ।

२०४४ सालमानै गोरखा दक्षिण बाहु चौथोबाट सम्मानित थपाले अन्य विभिन्न पुरस्कार तथा सम्मान प्राप्त गरेका थिए । उनको पार्थिव शरिरलाई आजै हेटौँडा ल्याएर अन्तिम संकार गर्ने तयारी भएको पारिवारिक श्रोतको भनाइ छ ।