एसएसपी भूपेन्द्र खत्री भन्छन्- व्यक्ति फेरिँदैमा नक्कली शरणार्थी प्रकरणको अनुसन्‍धान प्रभावित हुँदैन

काठमाडौं । दुई दिनअघि काठमाडौं प्रहरी प्रमुखको जिम्मेवारी सम्हालेका एसएसपी भूपेन्द्र खत्रीले जनताले आफूबाट गरेको अपेक्षालाई इमान्दारिताका साथ निर्वाह गर्ने प्रतिबद्धता जनाएका छन् ।

आइतबार पत्रकारसँगको भेटघाटमा उनले कोही अधिकृत तथा व्यक्ति फेरिँदैमा नक्कली भुटानी शरणार्थीको अनुसन्धान प्रभावित नहुने जिकिर गरे ।

‘यो वा त्यो नाममा कोही दोषी उम्किँदैनन् । कानूनले दिएको अधिकार प्रयोग गरी प्रकरणमा संलग्न सबैलाई छानबिन र अनुसन्धानको दायरामा ल्याउँछौं । कसैले शंका नगर्नुहोला । मबाट धेरैले गर्नुभएको अपेक्षालाई कामले देखाउँछु । ‘

खत्रीले शुक्रबार टेकुस्थित काठमाडौं प्रहरी परिसर पुगेर जिम्मेवारी सम्हालेका हुन् ।

केही दिनअघि गृह मन्त्रालयले खत्रीलाई काठमाडौं प्रहरीको कमान्ड जिम्मा लगाउने निर्णय गरेको थियो । नेपाली कांग्रेसका तत्कालीन सांसद मोहम्मद अफताव आलमलाई हतकडी लगाएका खत्री निडर र व्यवसायिक प्रहरी अधिकृतका रूपमा परिचित छन् ।

२०५६ सालमा प्रहरी निरीक्षकबाट सेवा सुरु गरेका उनी आफ्नो ब्याचबाट एसएसपी बढुवा हुँदा दोस्रो नम्बरमा थिए ।