प्रिमियम मूल्यमा सिटिजन्स लाइफको आइपीओ बिक्री खुला, कस्तो छ कम्पनीको अवस्था ?

काठमाडौं । सिटिजन लाइफ इन्सुरेन्सको आइपीओ बिक्री खुला भएको छ । कम्पनीले शुक्रबार (भदौ १५ गते) देखि सर्वसाधारणलाई प्रिमियम मूल्यमा आइपीओ बिक्री खुला गरेको हो। इन्सुरेन्सले प्रतिकित्ता १४४ रुपैयाँ प्रिमियम थप गरेर २४४ रुपैयाँ दरमा ९० लाख कित्ता सेयर सर्वसाधारणका लागि खुला गरेको छ ।

सर्वसाधारणले न्युनतम १० कित्तादेखि अधिकतम १५ लाख कित्तासम्मका लागि आवेदन दिन सक्नेछन् । कम्पनीले आफ्नो जारी पुँजी ३ अर्ब ७५ करोड रुपैयाँको ३० प्रतिशतले हुन आउने १ अर्ब १२ करोड ५० लाख रुपैयाँ बराबरको १ करोड १२ लाख ५० हजार कित्ता आइपीओ सर्वसाधारणलाई निष्कासन गरेको हो ।

यसमा १० प्रतिशत (११ लाख २५ हजार कित्ता) सेयर वैदेशिक रोजगारीमा रहेका नेपालीलाई निष्कासन भइसकेको छ । त्यस्तै, ५ प्रतिशत (५ लाख ६२ हजार ५००) कित्ता सेयर कर्मचारी र ५ प्रतिशत (५ लाख ६२ हजार ५०० कित्ता) सेयर सामूहिक लगानी कोषका लागि सुरक्षित गरिएको छ ।

सर्वसाधारणले बाँकी रहेको ९० लाख कित्ता सेयरका लागि आवेदन दिन सक्नेछन् । यसमा भदौ १९ गतेसम्म आवेदन दिन सक्नेछन् । सो अवधिमा सबै सेयर बिक्री नभएमा भदौ २९ गतेसम्म आवेदन दिन सकिने कम्पनीले जनाएको छ ।रेटिङ एजेन्सी इक्रा नेपालले यस इन्सुरेन्सलाई ‘इक्राएनपी ट्रिपल बी इस्यूअर रेटिङ’ प्रदान गरेको छ । जसले कम्पनीको दायित्व बहन गर्ने क्षमतामा मध्यमस्तरको जोखिम रहेको जनाउँछ ।

कस्तो छ कम्पनीको वित्तिय अवस्था ?

सिटिजन्स लाइफको प्रतिसेयर आम्दानी चालु आवमा (२०८०/८१) १६०.४१ रुपैयाँ पुग्ने अनुमान छ । गत वर्ष १९१.१२ रुपैयाँ पुगेको अनुमान कम्पनीले विवरणपत्रमा सार्वजनिक गरेको छ । यस कम्पनीले २०७४ कार्तिक २ गते देखि जीवन बीमा सम्बन्धी कारोबार सञ्चालन गर्दै आइरहेको छ । यसले १४० वटा शाखा तथा उपशाखा कार्यालयहरु स्थापना गरी जीवन बीमा सम्बन्धी व्यवसाय कारोबार सञ्चालन गर्दै आइरहेको छ । कम्पनीको अधिकृत पूँजी पाँच अर्व रुपैयाँ रहेको छ । यस कम्पनीको तत्काल चुक्ता पूँजी दुई अर्ब बैसठ्ठी करोड पचास लाख रुपैयाँ छ ।

साधारण सेयरको बाँडफाँड गरे पश्चात् कम्पनीको चुक्ता पूँजी तीन अर्व पचहत्तर करोड रुपैयाँ हुनेछ । यसका संस्थापकहरुमा एयर डाइनेष्टिक हेलि सर्भिसेज प्रालि, अनुजा लक्ष्मी धिताल, विकाश ज.ब.राणा,क्याविनेट श्रेष्ठ, गुडविल फाइनान्स, हिमालयन इन्फ्रास्ट्रक्चर फण्ड लि लगायत रहेका छन् । कम्पनीको अडिट गरिएको प्रतिसेयर नेटवर्थ २१.४९ रुपैयाँ रहेको छ ।