अष्ट्रेलियामा पनि गौराको रौनक : देउडाको जादु चलाउँदै अनिता चलाउने र रवि ओड (तस्बिरहरु)

काठमाडौं । नेपालको सुदूरपश्चिम भेगमा मनाइने गौरा पर्वको रौनक अष्ट्रेलियासम्म पुगेको छ । एक हुल कलाकारहरु अष्ट्रेलियाका विभिन्न शहरमा देउडा गुञ्जाइरहेका छन् ।

सुदूरपश्चिमका विभिन्न जिल्लाबाट अष्ट्रेलियामा पुगेका नेपालीहरुले स्थापना गरेको सुदूरपश्चिम समाजले हरेक वर्षजस्तै यस वर्ष पनि गौरा पर्वका अवसरमा सांस्कृतिक कार्यक्रमहरु गरिरहेको छ । सो कार्यक्रममा भाग लिन अहिले सुदुरपश्चिमेली गायक गायिका रवि ओड, अनिता चलाउने, भोजराज भट्ट, केशव अराजक, श्रृंखला जोशी लगायतका कलाकारहरु पुगेका छन् ।

कलाकारहरुको भ्रमण २१ दिन लामो छ । उनीहरुले चारवटा कार्यक्रममा प्रस्तुति दिँदैछन्, जसमा ३ वटा कार्यम मेलवर्न शहरमा आयोजना भइसकेको गायिका अनिता चलाउनेले जानकारी दिइन् । भोलि अर्को कार्यक्रम सिड्नीमा हुँदैछ ।

अनिता र रविको स्वरमा सजिएको ‘कर्णाली पारीको’ बोलको देउडा गीत हालै मात्र सार्वजनिक भएको थियो । युट्यूबमा दर्शकहरुले रुचाइरहेको उक्त देउडा गीत अष्ट्रेलियामा पनि उनीहरुले गुञ्जाइरहेका छन् । यसैगरि, आफ्ना हिट नम्बरहरु पनि पस्केका छन् ।

पहिलोपटक अष्ट्रेलिया भ्रमण आउँदा निकै रमाइलो अनुभव भएको अनिताले बताइन् ।

सुदरपश्चिम समाज २००९ सालमा स्थापना भएको हो । समाजका अध्यक्ष लक्ष्मी जोशीका अनुसार हरेक वर्ष गौरा पर्वमा नेपालबाट कलाकारहरु निम्त्याएर सांगीतिक कार्यक्रम गर्ने गरिएको छ । यसपालीको कार्यक्रममा हुड्केली डान्सको विशेष प्रस्तुति रहेको पनि उनले बताए ।

आफूहरुले सुदूरपश्चिमबाट आएका नेपालीहरुबीच आपसी सम्पर्क र भाइचारा उद्देश्यले संस्थाको स्थापना गरेको जोशीको भनाइ छ । अहिले यो संस्थाले अष्ट्रेलियामा आफ्नो मौलिकता र संस्कृतिको जगेर्ना गर्न पनि भूमिका खेलेको उनले बताए ।

‘हामीले यहाँ गरेका कार्यक्रममा उठेको रकमले सुदूरपश्चिमवासीलाई विभिन्न सहायता गरिरहेका छौं । कोभिडको टाइमदेखि विभिन्न बाढी पहिरोबाट पिडित भएकाहरुलाई सक्ने सहयोग गरेका छौं’, उनले भने ।

यसपालि संकलन हुने पैसाले सुदूरपश्चिमका तीनवटा विद्यालयमा अक्षयकोष खडा गर्ने उद्देश्य रहेको उनले सुनाए ।