निरुताको जीवनमा ‘सपना भई’ आउने को हुन् ?

काठमाडौं । पचासको दशकमा नेपाली चलचित्र उद्योगकी हिट नायिका निरुता सिंहले गत बिहीबार आफ्नो विवाह भएको सार्वजनिक गरेकी छन् ।

भारतको मुम्बई निवासी संजीभ गुलाटीसँग लगन गाँठो जोडेको भन्दै उनले इन्सटाग्राममार्फत सार्वजनिक गरेकी हुन् । तुलसी घिमिरे निर्देशित चलचित्र दक्षिणाबाट चर्चामा आएकी निरुताले दर्जनौँ नेपाली चलचित्रमा अभिनय गरेपनि पछिल्लो समय सक्रिय छैनन् ।

उनले ५० को उमेर कटेपछि विवाह गरेर कहिले बिहे गर्ने भन्ने वर्षौँदेखिका प्रश्नहरूको जवाफ दिएको बताएकी छन् । निरुताले अभिनय गरेको पहिलो सफल चलचित्र दक्षिणमा नायक भुवन केसीसँग ‘सपना भई आँखामा आउने को होला ?’ बोलेको गीतमा उनको नृत्य कालजयी मानिन्छ ।

उनले पति गुलाटीको बारेमा अरू बताएकी छैनन् । उनी मुम्बइमा सामान्य व्यवसाय गरेर बसेका व्यक्ति भएको बताइएको छ ।