भागवत गीताको बीचमा ड्यास राख्ने सुनिल थापाको प्रस्ताव, बोर्डमा छलफल जारी

काठमाडौं । चलचित्र ‘एक भगवत गीता’ को नामलाई लिएर उब्जिएको विवाद समाधानका लाग चलचित्र विकास बोर्डमा निर्णायक छलफल जारी छ । चलचित्रका निर्माता सुनिल थापाले नाम परिमार्जनबारे आफ्नो नयाँ प्रस्ताव राखेका छन् ।

थापाले भगवतलाई भागवत बनाउने तथा भागवत र गीताको बीचमा ड्याससमेत राख्ने प्रस्ताव सामूहिक छलफलमा गरेका हुन् । उनले प्रस्तावित नयाँ नामसहितको पोस्टरसमेत असन्तुष्ट पक्षलाई देखाए ।

थापाले पोस्टरबाट मयुरको र बाँसुरी हटाउने तथा ‘नेपाली सामाजिक चलचित्र’ लेख्ने पनि बताएका छन् । उनले पेश गरेको प्रस्तावलाई लिएर असन्तुष्ट धार्मिक समूहका प्रतिनिधिहरु आन्तरिक छलफलमा बसेका छन् ।

आजै सहमति जुटाएर चलचित्रलाई सेन्सर सिफारिस दिने बोर्डको तयारी छ ।