‘भगवत गीता’ को विवादबारे दीपकराज गिरी- व्यवसाय र धार्मिकता दुवैमा आँच आउनु हुँदैन

काठमाडौं । प्रदर्शोन्मुख चलचित्र ‘एक भगवत गीता’ को नामलाई लिएर उब्जेको विवाद अन्तत सुल्झिएको छ । चलचित्र विकास बोर्डमा आज भएको सर्वपक्षीय छलफलले ‘एक भगवत र एक गीता (सामाजिक कथा)’ नाममा सहमति जुटाएको हो ।

छलफलमा चलचित्र विकास बोर्डका अध्यक्ष भुवन केसी, चलचित्रका निर्माता सुनिलकुमार थापा, निर्माता संघका अध्यक्ष नवल खड्का तथा धार्मिक संघसंस्थाका प्रतिनिधि उपस्थित थिए । निर्माता तथा अभिनेता दीपकराज गिरीलाई पनि छलफलमा निम्त्याइएको थियो ।

कुनै पनि विषयमा खुलस्त धारणा राख्ने र बारम्बार विवादमा पनि आउने अभिनेता गिरीले आजको छलफलमा भने सन्तुलित बोले । उनले दुई पक्ष मिल्न जरुरी भएको अभिव्यक्ति दिए ।

बैठकमा दीपकराजको भनाइ यस्तो थियोः

यस मुलुकमा हामी ८० प्रतिशतभन्दा बढी हिन्दू धर्मावलम्बीहरु छौं । त्यसमा कुनै दुई मत छैन । केही समय अगाडि रिलिज भएको भारतीय चलचित्र ‘आदिपुरुष’ मा पनि विवादहरु आएका थिए । त्यसमा विवाद हुनु स्वाभाविक थियो किनकि त्यो चलचित्र हाम्रो शास्त्रमै आधारित रहेर बनाइएको थियो । चलचित्रमा राम, सीता, हनुमानलगायतका पात्रहरुलाई अस्वाभाविक रुपमा देखाइएको थियो । संवादको त झन् कुरै नगरौं । त्यही भएर हामी सबै नेपालीहरु नै त्यस चलचित्रको विपक्षमा थियौं ।

तर, त्यो विषय र यो विषय फरक छ । दृष्टिकोणको कुरा हो । तपाईं कसरी हेर्नुहुन्छ भन्ने हो । तपाईं कठोर भएर हेर्नुहुन्छ कि नरम भएर हेर्नुहुन्छ । हामी हिन्दूहरुको सबैभन्दा राम्रो पहिचान भनेको हामी माफी दिन्छौं । भ्रातृत्व वा प्रेम हामीमा भरपुर छ । धर्मलाई हामी अथाह मान्छौं । म आफैं पनि मैले पाएका सफलताको श्रेय ईश्वरलाई दिन्छु । जीवनमा मैले जे पनि पाएको छु, त्यो सबै भगवानको देन हो जस्तो लाग्छ ।

यो चलचित्रको कुरा गर्ने हो भने ‘भगवत गीता’ रिलिजको संघारमा छ । एउटा उदाहरण दिन चाहें । भारतमा एउटा ‘राम अवतार’ नामक चलचित्र बनेको थियो । जहाँ राम एउटा पात्र हो र अवतार अर्को पात्र । झट्ट सुन्दा ‘राम अवतार’ हाम्रो भगवान रामको कथा भएको चलचित्र हो जस्तो लाग्छ । तर त्यहाँ कुनै धार्मिकता छैन ।

‘भगवत गीता’ भन्नेबित्तिकै पनि भगवान कृष्णका कुरा, बाँसुरीका कुरा, धार्मिकताका कुरा हुनुपर्छ भन्ने भनाइमा म पनि समर्थन गर्छु । आस्था मेटिनु भएन । तर, ठ्याक्कै भगवत गीताकै कथा दुरुस्तै राख्नुपर्छ र चलचित्रको नाम भगवत गीता नै नराख भन्नेमा चाहिँ म सहमत जनाउँदिनँ । उहाँहरुको मेहनतमा शंकै नगरे हुन्छ । मैले बुझेसम्म उहाँहरु आफैं कृष्णभक्त हुनुहुन्छ । हरेक धाममा उहाँहरुको उपस्थिति हुन्छ । छोरी आफैं कृष्णको कट्टर भक्त हुन् ।

केही नगरी एक्कासि यो चलचित्र रिलिज भयो भने भोलि जरुर विरोध हुन्छ, त्यो पनि थाहा छ मलाई । किनकि यो एकदमै संवेदनशील विषय हो । तर, हाम्रो काम तोड्ने होइन, जोड्ने हो । यो चलचित्रले हामीलाई भविष्यको लागि सोच्न बाध्य बनाएको छ । सचेत बनाएको छ । चलचित्रको नाम राख्दा कसैको भावनामा ठेस नपुर्‍याइ, संवेदनशील विषयमा नाम राख्दा एकचोटी सोच्नुपर्ने सन्देश दिएको छ ।

अहिले हामी यस्तो विन्दूमा छ, जहाँ दुई पक्ष मिलेर अगाडि बढ्न जरुरी छ । धार्मिक विषयमा म पनि संवेदनशील भएकाले धार्मिक आस्थामा ठ्याक्कै चोट नपुर्‍याउने निष्कर्ष निक्लनुपर्छ । मिलेर अगाडि नबढे भोलि यसले ठूलो विरोधको रुप लिनसक्छ । त्यसैले व्यवसाय र धार्मिकता दुवैमा आँच नआउने नतिजा निस्कनुपर्छ । उहाँहरुले पनि नाम स्वाट्टै फेरेर रिलिज गर्न नसक्ने बाध्यता होला । त्यसैले कसरी के गर्न सकिन्छ, के हटाउन सकिन्छ, कसरी मिल्न सकिन्छ त्यता लाग्नुपर्छ । कसैलाई अन्याय नहोस् ।