१३ वर्षीया छात्राले गरिन् आत्महत्या, दुरुत्साहन आरोपमा प्रिन्सिपल र सञ्चालक पक्राउ

सुर्खेत । १३ वर्षीया छात्राको आत्महत्याको घटनालाई लिएर रुकुम पश्चिमको एक बोर्डिङ स्कुलका प्रिन्सिपल र सञ्चालकलाई प्रहरीले पक्राउ गरेको छ । चौरजहारी नगरपालिका-१ पुरानो बजारमा रहेको भ्यालि पब्लिक बोर्डिङमा ८ कक्षामा अध्ययरनरत् १३ वर्षीया सृष्टि गौतमले शुक्रबार आत्महत्या गरेकी थिइन् ।

सोही घटनालाई लिएर आत्महत्या दुरुत्साहनमा प्रिन्सिपल पुष्पा लामिछाने शाह र सञ्चालक युडेन भोटिया भण्डारीलाई पक्राउ गरेको जिल्ला प्रहरी कार्यालयका इन्स्पेक्टर धर्मेन्द्र खड्काले जानकारी दिए ।

विद्यालयमा प्रिन्सिपल शाह र सञ्चालक भण्डारीसहितले छोरीमाथि कुटपिट गरेको र घर आएपछि विद्यालयको पोसाक लगाएकै अवस्थामा झुण्डिएर आत्महत्या गरेको परिवारले बताएका छन् ।

घटनाबारे थप अनुसन्धान सुरु गरिएको प्रहरीले जनाएको छ ।