प्रधानमन्त्रीलाई उपेन्द्रको सुझाव- खुद्राखुद्री काममा नअल्झिनुस्

विराटनगर । जनता समाजवादी पार्टी नेपालका अध्यक्ष उपेन्द्र यादवले प्रधानमन्त्रीले खुद्राखुद्री काममा अल्झिरहेको बताएका छन् । समाजवादी मोर्चाको कोशी प्रदेशस्तरीय सन्देश सभामा उनले प्रचण्डभन्दा महान क्रान्तिकारी को खोज्ने ? भन्दै क्रान्तिकारी नेताले खुद्राखुद्री कुरामा नअल्झी आर्थिक राजनैतिक र सामाजिक न्याय दिलाउनेगरी काम गर्नुपर्ने बताए ।

यादवले भने, ‘सशस्त्र आन्दोलन गरेर आएको मान्छेको नेतृत्वको सरकारले काम नगरे कसले गर्ने ? यो भन्दा क्रान्तिकारी को हुने ? यही सरकारले काम गर्नुपर्छ ।’ यो सरकारले काम नगरे प्रतिगमन शक्तिहरूले टाउको उठाउने उनको जिकिर छ ।

उनले राजनैतिक हिसाबले देशमा महत्वपूर्ण अधिकारहरू प्राप्त गरेको भएपनि व्यवहारमा नदेखिएो बताए ।

‘१६ वर्षमा १३ पटक सरकार बदलियो तर राजनैतिक आर्थिक-सामजिक विभेद कायमै छ । सशस्त्र आन्दोलन, मधेश विद्रोहबाट प्राप्त उपलब्धि संस्थागत हुन सकेको छैन । प्रदेशहरूले दिएको अधिकार लिन कानून समेत बनाउन सकेका छैनन् ।’

राजनितिक अस्थिरता सरकार बनाउने र टिकाउनमा सबै शक्ति लगाएका कारण संघियतालाई संस्थागत गर्न नसकेको यादवको भनाइ छ । उनले स्थानीय तहमा विकृति बढ्दै गएको बताएका छन् ।

उनले कोशीको नामकरणबाट निम्तिएको समस्या पनि समाधान हुनुपर्नेमा जोड दिएका छन् ।