‘नाङ्गो गाउँ’ को प्रिमियर: सबै आए, कर्मा आएनन् (तस्बिरहरु)

काठमाडौं । दीपेन्द्र लामा निर्देशित चलचित्र ‘नाङ्गो गाउँ’ को आज प्रिमियर गरिएको छ । शुक्रबारदेखि प्रदर्शनमा आउन लागेको चलचित्रको प्रिमियर काठमाडौं सीतापाइलास्थित सीके सिनेमामा भएको हो ।

प्रिमियरमा चलचित्रका कलाकारहरु दयाहाङ राई, मिरुना मगर, विशाल पहारी, राज थापा, कमलमणि नेपाल, अंकित खड्का र साम्राज्ञीलगायत उपस्थित थिए । तर, चलचित्रका अन्य  प्रमुख कलाकारहरु शिशिर बाङ्देल, कर्मा र बुद्धि तामाङ प्रिमियरमा देखिएनन् । साम्राज्ञी र कर्मा ‘नाङ्गो गाउँ’को पब्लिसिटीमा पनि सक्रिय थिएनन् ।

प्रिमियरमा फिल्म तथा संगीत क्षेत्रबाट विभिन्न अतिथिहरुलाई आमन्त्रण गरिएको थियो । कलाकार जितु नेपाल, गायक राजेश पायल राईलगायत प्रिमियरमा उपस्थित थिए ।

चलचित्रमा दयाहाङ र मिरुना मुख्य भूमिकामा छन् । साथमा कर्मा, साम्राज्ञी, शिशिर, बुद्धि, रवीन्द्रसिंह झालगायतको मुख्य भूमिका रहेको छ । ‘नाङ्गो गाउँ’ यही भदौ २९ गते रिलिज हुँदैछ ।