बालेनलक्षित झलनाथको टिप्पणी- सिंहदरबारमा आगो लगाउँछु भन्ने अभिव्यक्ति अपराधिक, प्रशंसा हुनु बिडम्बना

काठमाडौं । नेकपा एकीकृत समाजवादीका सम्मानित नेता झलनाथ खनालले सिंहदरबारमा आगो लगाउँछु भन्ने अपराधिक अभिव्यक्ति भएको टिप्पणी गरेका छन् ।

नेकपा एस निकट महिला संघको कार्यक्रमलाई सम्बोधन गर्दै काठमाडौं महानगरपालिका प्रमुख बालेन शाहको अभिव्यक्तिको प्रशंसा हुनु गलत भएको बताए ।

उनले भने, ‘एउटाले सिंहदबारमा आगो लगाइदिन्छु भन्यो अर्कोले नेताको गर्दनमा खुकुरी हान्यो ती मान्छेहरुलाई मोबाइल हेर्ने हो भने हजारौं मान्छेले स्याबासी दिइरहेका छन् । ती त अपराधिक तत्वहरु हुन् नि । सिंहदरबारमा आगो लगाउँछु भन्ने जसले गरेपनि अपराधिक अभिव्यक्ति हो । यस्तो अभिव्यक्तिको प्रशंसा हुनु बिडम्बना मात्रै हो । तर, प्रशंसा हुन थालेको छ । त्यसको कारण खोज्नुपर्ने छ ।’

उनले तत्कालीन नेकपा नेतृत्वको सरकार हुँदा अध्यक्ष केपी शर्मा ओलीले कुर्सीमात्रै देखेपछि अहिले अराजकता बढाएको आरोप लगाए ।