एसिया कप फाइनल : साख फर्काउने श्रीलंकाको धोको, भारत ५ वर्षदेखि उपाधिको भोको

काठमाडौं । एसिया कप क्रिकेटको फाइनल भिडन्त आज भारत र श्रीलंकाबीच हुँदैछ । तर, वर्षातको भविष्यवाणी गरिएको हुँदा आजै नतिजा आउँछ भन्ने निश्चित छैन ।

आयोजक राष्ट्र पाकिस्तान भए पनि एसिया कपका धेरै खेलहरू श्रीलंकामा भइरहेका छन् । र, अधिकांश खेलमा वर्षाले दु:ख दिएको छ । आज पनि पानी पर्ने यथेष्ट सम्भावना रहेको प्रक्षेपण मौसम पूर्वानुमान गर्ने निकायहरूले गरेका छन् । यदि वर्षाको अवरोधले आज नतिजा नआएको खण्डमा भोलि ‘रिजर्भ डे’ राखिएको छ । तर, मौसमी प्रक्षेपणअनुसार भोलि पनि पानी पर्ने सम्भावनालाई नकार्न सकिन्न ।

यदि आज एउटा टिमले ब्याटिङ गरेर दोस्रो टिमले पनि कम्तिमा २० ओभर ब्याटिङ गर्न भ्यायो भने डीएल मेथडको आधारमा विजेता घोषित गरिने छ । तर, दोस्रो इनिङमा २० ओभरको खेल हुन नसकेको खण्डमा आज जुन स्थितिमा खेल रोकिएको छ, त्यही स्थितिबाट भोलि खेल सुचारु हुन्छ । र, भोलि दोस्रो इनिङको कम्तिमा २० ओभरको खेल सम्भव भएमा डीएल मेथडबाट नतिजा घोषणा हुन्छ ।

यदि आज र भोलि दुवै दिनको खेल वर्षाले बिथोलेर नतिजा निकाल्न सकिएन भने भारत र श्रीलंका दुवै टीमलाई संयुक्त विजेता घोषणा गने छ । मौसम पूर्वानुमानका अनुसार आज कोलम्बोस्थित आर प्रेमदासा रंगशाला क्षेत्रमा पानी पर्ने सम्भावना ९० प्रतिशतसम्म छ । यसलाई टुक्र्याएर विश्लेषण गर्दा वर्षातको सम्भावना बिहान साढे ९ बजे–५० प्रतिशत, मध्यान्न १२ः३० बजे–५० प्रतिशत, दिउँसो ३ः३० बजे–६० प्रतिशत, राति ९ः३० बजे ६० प्रतिशत रहेको छ । साथै, बेलुकी हावाहुरीको सम्भावना पनि रहेको जनाइएको छ । एसिया कपको सुपर ४ का सबै खेलहरू वर्षात्ले प्रभावित बनेका थिए ।

यसअघि सन् २००२ को एसिया कप फाइनल वर्षाले बिथोलेको थियो । रिजर्भ डेमा पनि पानी परेर नतिजा आउन नसकेपछि त्यसबेला पनि भारत र श्रीलंका संयुक्त विजेता बनेका थिए ।

कसको पल्ला भारी ?

पछिल्लो समय श्रीलंकाको क्रिकेट स्तर अलिकति खस्किएको थियो । कुमार सांगाकारा र महेला जयवर्दनाको पुस्ताले सन्न्यास लिएपश्चात् टीममा अनुभवी ब्याट्सम्यानहरूको खडेरी पर्‍यो । युवा ब्याट्सम्यानहरूले टीमलाई अघि बढाइरहेका छन् ।

यसपालि विश्वकपमा स्थान बनाउन समेत श्रीलंकाले छनोट प्रतियोगिताको सहारा लिनुपरेको थियो । यद्यपि, श्रीलंकाले अघिल्लो एसिया कप जितेर आफ्नो युवा टीमको सम्भावनालाई उजागर गर्न सफल भयो । यो एसिया कपमा उपाधि रक्षा गर्दै श्रीलंका आगामी एकदिवसीय विश्वकपअघि आफ्नो आत्मविश्वास बुलन्द बनाउन चाहन्छ । यदि श्रीलंका फाइनलमा विजयी भए सबैभन्दा धेरै पटक एसिया कपको उपाधि जित्ने भारतको रेकर्डसँग बराबर गर्ने छ ।

अर्कोतर्फ भारत क्रिकेटको महाशक्ति हो र जुनसुकै प्रतियोगितामा पनि भारतलाई उपाधि दाबेदारको रूपमा लिने गरिएको छ । तर, भारतले आईसीसी र एसीसीले गराउने कुनै पनि प्रतियोगिता नजितेको ५ वर्ष भइसक्यो । यसअघि भारतले जितेको अन्तिम उपाधि भनेको एसिया कप नै हो । सन् २०१८ को संस्करणमा भारत विजेता बनेको थियो ।

एसिया कपको सबैभन्दा बढी उपाधि भारतकै पोल्टामा छन् । भारतले योभन्दा अघि ७ पटक एसिया कपको उपाधि जितिसकेको छ । तर, यति बेला उपाधिको खडेरीमा रहेको भारत एसिया कपबाटै यसलाई तोड्न र आगामी विश्वकपका निम्ति आफ्नो दाबेदारी थप मजबुत बनाउन चाहन्छ ।

आज खेल हुन गइरहेको प्रेमदाशा रंगशालाको पिचले स्पिनर बलरहरूलाई सहयोग गर्ने अनुमान गरिएको छ । यसअघि सुपर ४ को प्रतिस्पर्धामा श्रीलंकाका स्पिनरले भारतीय ब्याट्सम्यानलाई आच्छुआच्छु पारेका थिए । श्रीलंकाका पार्ट टाइम स्पिनरले नै भारतको ४ विकेट लिएका थिए । फाइनलमा पनि श्रीलंकाले भारतविरुद्ध बढीभन्दा बढी स्पिनर नै प्रयोग गर्ने छ ।

तर, फाइनअगाडि श्रीलंकालाई ठूलो धक्का लाग्यो । स्पिनर महिस थिकसाना चोटका कारण फाइनल खेल्न नसक्ने भएका छन् । उनी जुनसुकै बेला विकेट लिनसक्ने क्षमता भएका खेलाडी थिए । उनलाई सम्भवतः लेगस्पिनर दुसान हेमन्थले प्रतिस्थापन गर्ने छन् ।

त्यसो त भारतले पनि आफ्ना स्पिन अलराउन्डर अक्षर पटेललाई चोटका कारण गुमाएको छ । उनको स्थानमा तिलक बर्माले टिममा स्थान बनाउन सक्छन् । यद्यपि, त्यसका लागि इन फर्म ब्याट्सम्यान इसान किसनलाई बाहिर राख्नुपर्ने हुन्छ ।

भारतको फास्ट र स्पिन दुवै पक्ष बलियो छ । फास्ट बलर जसप्रित बुमराह टिमका सबैभन्दा धारिला बलर हुन् । भारतसँग कुलदीप यादव र रविन्द्र जडेजाजस्ता वर्ल्ड क्लास स्पिनर छन् ।

श्रीलंकासँग पनि स्पिनरको कमी छैन । यसअघि भारतविरुद्धको म्याचमा दुनिथ वेलालागेले सनसनी प्रदर्शन गर्दै ५ विकेट लिएका थिए । उनको स्पिन भारतीय ब्याट्सम्यानले झेल्न सकेका थिएनन् । बलियो भन्ने गरिएको भारतीय बलिङ ट्र्याकमा धर्मराउने गरेको छ । यसअघिका खेलहरूमा जस्तै फाइनलमा पनि पिचले बलरलाई सहयोग गर्‍यो भने भारतलाई सोचे जति सहज नहुन सक्छ ।

भारतीय ब्याटिङमा एक से एक स्टार ब्याट्सम्यान छन् । तर, सबैभन्दा बढी विराट कोहलीमा निर्भर छ भारत । सुपर ४ को अन्तिम खेलमा बंगलादेशविरुद्ध भारतले कोहलीलाई बेञ्चमा राखेको थियो र म्याच हारेको थियो । फाइनलमा भने भारतले पूरा शक्ति लगाउने छ ।

श्रीलंकाको ब्याटिङ भारतको जस्तो स्टारहरूले भरिएको छैन । यद्यपि, टिममा केही प्रतिभाशाली ब्याट्सम्यान छन् । शक्तिशाली टिमहरुलाई पाखा लगाउन सक्ने शक्ति श्रीलंकासँग छ ।

भारतलाई पराजित गर्दै उपाधि रक्षा गरेको खण्डमा श्रीलंकाले क्रिकेट महाशक्तिहरुको सूचीमा आफूलाई पुनर्स्थापित गर्न सक्छ ।