क्रिकेट संघ चुनाव : सचिवमा पारसको बलियो दाबेदारी, रोशनको आँखा उपाध्यक्ष कि कोषाध्यक्षमै ?

काठमाडौं । नेपाल क्रिकेट संघ (क्यान) को केन्द्रीय नेतृत्वका लागि अम्तिम दौड आरम्भ भएको छ । अध्यक्षमा चतुरबहादुर चन्दको दोहोरिने सम्भावना बलियो देखिँदा पदाधिकारीको खाका भने स्पष्ट भइसकेको छैन ।

क्यानमा पदाधिकारी संख्या सिमिति छन् । केन्द्रीय कार्यसमितिमा एक उपाध्यक्ष, एक सचिव र एक कोषाध्यक्ष रहने व्यवस्था छ । कुर्सी तीनवटा मात्रै भए पनि आकांक्षी धेरै देखिएका छन् । अध्यक्षका प्रत्याशी चन्दले को–कोलाई छान्छन् भन्ने मुख्य कौतुहलको विषय हो ।

क्यानभित्र अहिले कोषाध्यक्ष रोशन सिंह र बाग्मती अध्यक्ष पारस खड्काका दुईवटा गुट सतहमा देखिएका छन् । उनीहरु दुवै चतुरसँग मिलेर जान इच्छुक छन् । पारस खड्का केन्द्रीय सचिवका आकांक्षी हुन् । यदि चतुरले आफूलाई सचिवमा सहयोग गरेर अध्यक्षमा उनलाई समर्थन गर्ने पारसको रणनीति छ ।

कोषाध्यक्ष रोशन सिंह पनि चन्दमै निर्भर देखिएका छन् । उनले केही समय अगाडि नै चन्दसँग भित्री समझदारी पनि गरिसकेका थिए । जसअनुसार उनले पदाधिकारीमा आफ्नो स्थान सुनिश्चित गर्दै अध्यक्षमा चन्दलाई समर्थन गर्नेछन् ।

सिंहले कुन पदमा उम्मेदवारी दिनेछन् भन्ने निधो भइसकेको छैन । निकट स्रोतका अनुसार उनी उपाध्यक्ष वा कोषाध्यक्षमध्ये एउटामा लड्ने मनस्थितिमा छन् ।
नेपाल प्रेससँगको कुराकानीमा सिंहले आज बेलुकासम्ममा आफ्नो उम्मेदवारीबारे टुंगो लगाउने बताए ।

‘अहिले पनि टिमसँग छलफलमै छु । टीमको सल्लाहअनुसार नै उम्मेदवारी दिने हो,’ उनले भने । पदाधिकारीमा नै उम्मेदवारी दिनुहुन्छ नि भन्ने प्रश्नमा सिंहले जवाफ दिए, ‘अँ, त्यस्तै होला ।’

यता अध्यक्ष चतुर भने दुवै समूहलाई समेट्ने मनस्थितिमा देखिन्छन् । पारस र रोशन दुवैलाई उनले कुनै वचन दिइसकेका छैनन् । तर उनीहरु दुवैलाई पदाधिकारीमा समेटेर लैजाने सोच रहेको निकट स्रोतको दाबी छ ।