सामाजिक सुरक्षा कोषको कार्यकारी निर्देशकमा कविराज अधिकारी नियुक्त

काठमाडौं । सामाजिक सुरक्षा कोषको कार्यकारी निर्देशकमा कविराज अधिकारी नियुक्त भएका छन् । कोषकाे सञ्चालक समितिले अधिकारीलाई सोमबार कार्यकारी निर्देशक पदमा नियुक्त गरेको हो ।

कानुन, न्याय तथा संसदीय मामिला मन्त्रालयका सहसचिव हुमबहादुर केसीको संयोजकत्वमा गठित उपसमितिले कार्यकारी निर्देशकका लागि अधिकारीसहित लीलाराज ढकाल र अशोक पौडेल गरेर तीन जनाको नाम सिफारिस गरेको थियो । उपसमितिमा नेपाल उद्योग परिसंघका तर्फबाट गोकुल भण्डारी र ट्रेड युनियन प्रतिनिधि सुनिता थापा सदस्य थिए ।

उपसमितिबाट सिफारिस भएका तीन जना मध्येबाट अनुभव, उनीहरुले पेस गरेको व्यावसायिक कार्ययोजना र नेतृत्व गर्ने क्षमता समेतलाई मूल्यांकन गरी सञ्चालक समितिले अधिकारीलाई कार्यकारी निर्देशक नियुक्त गरेको हो । राष्ट्रिय वाणिज्य बैंकको उपप्रमुख कार्यकारी अधिकृतबाट एक वर्षअघि सेवानिवृत्त अधिकारी पेसाले चार्टर्ड एकाउन्टेन्ट हुन् ।

कोषको कार्यकारी निर्देशकको पदावधि चार वर्षको रहनेछ । कोषको कार्यकारी निर्देशकका लागि १२ जनाले आवेदन दिएका थिए । उपसमितिले त्यसमध्ये ६ जनालाई छनोट गरेको छोटो सूची (सर्टलिस्ट) निकालेको थियो । उनीहरुको प्रस्तुतीकरण असोज २ गते थियो भने अन्तर्वार्ता ४ गते सञ्चालन भएको थियो । अन्तर्वार्तापछि तीन जनाको नाम समितिले सिफारिस भएको हो ।

कोषको तत्कालीन कार्यकारी निर्देशक कपिलमणि ज्ञवालीको चार वर्षे कार्यकाल साउन १४ मा सकिएको थियो । कोषको कार्यकारी निर्देशकमा उनी चार वर्षअघि २०७६ साउनमा नियुक्त भएका थिए ।