विज्ञान र अन्वेषणकेन्द्रित ‘अस्तित्व’ को भिडिओ सार्वजनिक, गौरी मल्ल र महावीर पुनको मुख्य भूमिका

काठमाडौं । अभिनेत्री गौरी मल्ल र राष्ट्रिय आविष्कार केन्द्रका संस्थाका महावीर पुनको विशेष भूमिका रहेको ‘अस्तित्व’ को म्युजिक भिडिओ सार्वजनिक गरिएको छ ।

सुविद गुरागाइँको शब्द रचना रहेको यस गीतमा संकेत अगस्तीको संगीत र श्रेय अगस्तीको स्वर रहेको छ । संगीत संयोजन विशाल निरौलाले गरेका छन् । सुवास दाहालको निर्माणमा बनेको गीतमा गौरी, महावीरसहित नूर दाहाल, सुवास दाहाल, पुष्पराज गौतम, अन्जना कुइँकेल ‘पाठक’, सपना पोखरेल, सुगम भट्टराई र संयम भट्टको पनि अभिनय छ ।

साथै यस लघु सांगितिक चलचित्रमा दिनेश पराजुलीको छायांकन, सुष्मा परियारको शृंगार, साक्षी श्रेयको कथा, शिलान लम्सालको सम्पादन र खेमनाथ खनाल को सहायक निर्देशन र स्क्रिनप्ले छ । म्युजिक भिडिओको निर्देशन भने संकेत अगस्तीले गरेका छन् ।

ADHD के हो र यससम्बन्धी रोगबाट ग्रसित भएका एक बालकको अभिरुचि विज्ञान तथा अन्वेषण र आविष्कारमा केन्द्रित रही केही नयाँ गरौं भन्ने आशयसहितको कथावस्तु भिडिओमा समेटिएको छ । शिशिर भण्डारी युट्युब च्यानलबाट सार्वजनिक उक्त भिडिओले विद्यार्थी, बालबालिका र किशोरलाई सकारात्मक सन्देशसहित ऊर्जा दिने निर्माण टोलीको विश्वास छ ।