कञ्चनपुरमा महिला हत्या आरोपमा चारजना पक्राउ, यसरी भएकाे थियाे घटना

कैलाली । कञ्चनपुरमा एक महिलाको हत्यामा संलग्न चार जनालाई प्रहरीले पक्राउ गरेको छ । जिल्लाको पुनर्वास नगरपालिका वडा नम्बर ३ आईबिआरडीकी २७ वर्षीया लक्ष्मी घर्तीको हत्या गर्ने चार जना युवक डेढ महिनापछि पक्राउ परेका हुन् ।

साउन २९ गते आफ्नो घर आईबिआरडी बजारदेखि ‘घ’ गाउँस्थित मामाघर जान्छु भनी हिँडेकी लक्ष्मी भोलीपल्ट बिहान घर नजिकैको सडक क्षेत्रमा मृत अवस्थामा फेला परेकी थिइन् । लक्ष्मीको हत्या भएको भन्दै किटानी दर्ता भएको थियो ।

त्यसलगत्तै अनुसन्धान सुरु गरेको प्रहरीले डेढ महिनापछि सफलता हात पारेको हो । घटनामा संलग्न रहेको भन्दै बेलौरी नगरपालिका वडा नम्बर १ बस्ने सरोज राना, सोही ठाउँ बस्ने १९ वर्षीय राहुल राना, लालझाडी गाउँपालिका वडा नम्बर १ नौरङ्गा बस्ने ३३ वर्षीय सेनराज राना र नौरङ्गाकै पर्शु रानालाई पक्राउ गरिएको प्रहरीले जनाएको छ ।

घटनामा संलग्न राज कुमार रानाको खोजी भइरहेको कञ्चनपुरका प्रहरी उपरीक्षक कमल थापाले बताए । घटना रहस्यमयी भएकाले प्रहरीले विभिन्न कोणबाट अनुसन्धान सुरु गरेको जनाएको छ ।

यसरी भयो हत्या

प्रहरीका अनुसार लक्ष्मी र सरोजबीच चिनजानकै सम्बन्धका आधारमा सोही साँझ लालझाडी जङ्गलमा मचान हेर्नका लागि गएको र त्यहाँ मदिरा सेवनपछि विवाद हुँदा युवकहरूले लक्ष्मीलाई मचानको तेस्रो तलाबाट भुईँमा खसाएर घाइते बनाएका थिए । घाइते भएकी लक्ष्मीको उपचारको साटो घर नजिकै ल्याएर फ्याँकेपछि राति नै लक्ष्मीको मृत्यु भएको बताइएको छ ।

अनुसन्धानपछि असोज १४ गते पक्राउ परेका चारै जनालाई अदालतबाट म्याद थप गरेर अनुसन्धान अघि बढाइएको प्रहरीले जनाएको छ । उनीहरू विरुद्धमा कर्तव्य ज्यान अन्तर्गत मुद्दा दायर गरिएको छ । प्रहरीले यस सम्बन्धमा थप अनुसन्धान जारी रहेको जनाएको छ ।