विश्वकीर्तिमानी दीपेन्द्र भन्छन्- ६ वटा छक्का हानेपछि रेकर्ड बन्न सक्छ भन्ने दिमागमा आयो (भिडिओ)

काठमाडौं । चीनमा आयोजित एसियन गेम्समा सहभागी भएर नेपाली टिम आज स्वदेश फर्किएको छ । नेपालले पदक जित्न असफल भए पनि उत्कृष्ट प्रदर्शन गरेका खेलाडीहरुको अनुहारमा विजयी मुस्कान थियो ।

सबैभन्दा पहिले पत्रकारको घेरामा परे दीपेन्द्रसिंह ऐरी, जसले मंगोलियाविरुद्धको खेलमा ९ बलमा अर्धसतक बनाएर दुर्लभ विश्वकिर्तिमान राखेका थिए । उनलाई पत्रकारले यही रेकर्डमा केन्द्रीत भएर प्रश्न गरे ।

दीपेन्द्रले आफू रेकर्ड बनाउने सोचेर क्रिजमा नगएको तर, खेल्दाखेल्दै बनेको भन्दै खुशी व्यक्त गरे ।

उनले भने, ‘विश्वकीर्तिमान भनेपछि खुशी त लागिहाल्छ । तर म रेकर्ड नै बनाउँछु भनेर गएको थिइनँ । ६ वटा छक्का भएपछि चाहीँ वल्र्ड रेकर्ड बन्न सक्छ भन्ने दिमागमा आएको थियो ।’

आफ्नो किर्तिमानमा सिंगै टिमले खुशी मनाएको र बधाइ साटासाट गरेको उनले बताए । भारतसँगको खेलमा पनि उनले लगातार तीन छक्का हानेका थिए ।

त्यसलाई सम्झिँदै दीपेन्द्रले भने, ‘इन्डियासँग त रन कसरी चेज गर्ने भन्ने मात्रै थियो दिमागमा । त्यो ओभरमा कति रन निकाल्न सकिन्छ भन्ने क्याल्कुलेट गरिरहेका थियौं । ठूलो सट हान्नैपर्ने अवस्था थियो ।’

उनले क्यानाडामा आयोजित ग्लोबल टि–२० मा सहभागी हुँदा पनि आफूलाई धेरै सिक्ने मौका मिलेको बताए ।

नेपाली टिमका कप्तान रोहित पौडेलले सोचेजस्तो रिजल्ट नआएपछि सकारात्मक पक्ष धेरै भएको प्रतिक्रिया दिए ।

उनले भने, ‘हामीले दुई–तीन एरियामा राम्रो गर्न सकिन्थ्यो । डेथ ओभर बलिङ र फिल्डिङमा अलिकति कमजोरी भयो । तर, समग्रमा खुशी छौं ।’