बझाङका भूकम्प पीडितको गुनासो- प्रधानमन्त्रीलाई भेट्न पाएनौं (भिडिओ)

कैलाली । बझाङका भूकम्प पीडितले प्रधानमन्त्रीलाई भेट्न नपाएको गुनासो गरेका छन् । पीडितहरुले प्रधानमन्त्री प्रचण्डलाई भेटी आफूहरुको समस्या राख्न नपाएको गुनासो गरेका हुन् ।

प्रधानमन्त्री प्रचण्ड बझाङ आउने खबर पाएपछि सदरमुकाम पुगेका दुरदराजका भूकम्प पीडितहरुले समस्या राख्न पाउने आशा राखेका थिए ।

बिहानै एक घण्टाको बस यात्रा गरेर सदरमुकाम चैनपुर पुगेका थलारा गाउँपालिका- ९ सिरेटाका ज्ञानु दमाईले भने, ‘प्रधानमन्त्रीज्यूलाई केही समस्या सुनाउँला भनेर बिहानै आएको हुँ । भेटेर कुरा राख्न त के, देख्नै पाइनँ । पहिले बाढी पहिरोका बेला आएका प्रधानमन्त्री हेलिकप्टरबाट हेरेर जानुभयो । अहिलेका प्रधानमन्त्री भुईंमा त आउनुभएकै हो । तर, गाडीमै हुइँकेर प्रशासनभित्र छिर्नुभयो । हामी गेटमै रोकियौं ।’

जयपृथ्वी नगरपालिका- १० का शम्भु ओखेडाको पनि प्रधानमन्त्रीलाई भेटेर कुरा राख्न नपाएको गुनासो छ । ओखेडाले पनि आफ्नै घर नजिकै भएर हिँडे पनि प्रधानमन्त्रीले एक शब्द नबोलेर जाँदा दुःख लागेको बताए ।

उनले भने, ‘हाम्रो टोलका एक जना पीडितसँग मात्रै बोल्नुभयो । हाम्रो पनि थुप्रै समस्या राख्ने मन थियो । तर, एक हुल आयो, छिटोछिटो कुरा गरेर प्रधानमन्त्रीज्यू हेर्दै नहेरी जानुभयो ।’

जयपृथ्वी नगरपालिका- ३ का वीरबहादुर ओलीले पनि प्रहरीले गेटमै थुन्दा प्रधानमन्त्रीसँग दुःखेसो पोख्न नपाएको गुनासो गरे ।

प्रधानमन्त्रीलाई धेरै कुरा राख्न आएका केही युवाले त झन् जिल्ला प्रशासन कार्यालय बझाङको गेटमै सरकारविरुद्ध नाराबाजी गरे । उनीहरुले प्रधानमन्त्री भेट्न नदिइएको भन्दै आक्रोश पोखे ।

प्रधानमन्त्रीविरुद्ध बोलेको भन्दै प्रहरीले उनीहरुलाई केहीबेर नियन्त्रणमा लिएको थियो ।