निजामती विधेयक र सार्वजनिक प्रशासन सुधारका उपाय खोजी गर्न रास्वपाले बनायो पूर्व प्रशासकको कार्यदल

काठमाडौं । राष्ट्रिय स्वतन्त्र पार्टी (रास्वपा)ले निजामती विधेयक र सार्वजनिक प्रशासन सुधारका उपाय खोजी गर्न पूर्व प्रशासक सम्मिलितको कार्यदल बनाएको छ ।

शुक्रबार बसेको केन्द्रीय कार्यसम्पादन समितिले निजामती विधेयक र सार्वजनिक प्रशासन सुधारका उपाय खोजी गर्न पूर्व प्रशासक सम्मिलितको कार्यदल बनाउने निर्णय गरेको हो । देहायका निर्णयहरु गरेको छ ।

निजामती सेवा विधेयक तथा नेपालको सार्वजनिक प्रशासनका भएका, हुनुपर्ने तथा गरिनुपर्ने व्यवस्थाका सम्बन्धमा अध्ययन गरी प्रतिवेदन पेश गर्न विज्ञहरुको सहमति तथा संलग्नतामा एक अध्ययन कार्यदल गठन गरिएको रास्वपाले जनाएको छ ।

कार्यदलमा पूर्व सचिव शारदा प्रसाद त्रिताल, पूर्णचन्द्र भट्टराई, पूर्व सहसचिव भागवत खनाल, पूर्व प्रशासक तथा अधिवक्ता कृष्णप्रसाद अधिकारी र चार्टर्ड एकाउन्टेन्ट, पूर्व प्रशासक लिलाराज ढकाल रहेका छन् ।

यस्तै नेपाल ऊर्जा क्षेत्रको विस्तृत अध्ययन गरी पार्टीको तर्फबाट उर्जा नीति, योजना र मार्गचित्र तयार गरी केन्द्रीय समितिलाई पेश गर्न छुटै कार्यदल गठन गरिएको छ ।कार्यदलमा ऊर्जा तथा भूमिगत संरचना विज्ञ, संयोजक ई. श्रीराम न्यौपाने, ऊर्जा विज्ञ ई.देबेन्द्र कार्की,
र ई. डा.सरोज अधिकारी रहेका छन् ।