‘स्थानीय सरकार अपेक्षा र अवस्था’ लिएर आइन् पूर्व उपमेयर कविता, सिङ भाँच्चिएका गाउँका सिंहदरबार

काठमाडौं । स्थानीय सरकारका समस्या तथा काम गर्दाका भोगाइहरूलाई समेटेर नेपाल नगरपालिका संघकी पूर्व सदस्य कविता ढुंगानाले पुस्तकको रूप दिएकी छन् ।

नुवाकोटको बेलकोटगढी नगरपालिकाकी पूर्व उपमेयर ढुंगानाको पुस्तक ‘स्थानीय सरकार,अपेक्षा र अवस्था’ शनिवार काठमाडौंमा विमोचन भएको हो ।

माओवादी केन्द्रकी युवा नेता समेत रहेकी ढुंगानाको पुस्तक प्रधानमन्त्री पुष्पकमल दाहाल प्रचण्डले विमोचन गरेका हुन् । शहीद भरत ढुंगानाकी छोरी कविता बेलकोटगढीको पहिलो उपमेयर हुन् ।

पुस्तक विमोचन गर्दै प्रधानमन्त्रीले कविताको पुस्तकले जनप्रतिनिधिहरूको अवस्था र संविधानको कार्यान्वयनको बारेमा विस्तृतमा व्याख्या गरेको बताए ।

पुस्तक विमोचन समारोहमा कांग्रेस नेता अर्जुन नरसिंह केसी,नेकपा एमालेका स्थानीय तह विभाग प्रमुख देवेन्द्र दाहाल,विज्ञ बालानन्द पौडेललगायतले स्थानीय सरकारका अपेक्षा र अवस्थाबारे पुस्तकले विस्तृतमा जानकारी दिने बताए ।

पुस्तकमा स्थानीय सरकारबाट जनताले धेरै अपेक्षा गरेको तर संविधान प्रदत्त अधिकारहरूको समेत राम्रोसँग प्रयोग गर्न नसकिएका विषयलाई विस्तृतमा व्याख्या गरिएको छ ।

पुस्तक स्थानीय सरकारका प्रतिनिधिहरूका साथै नीति निर्माताहरूका लागि पनि मार्गदर्शक बन्ने वक्ताहरूले बताए । गाउँ गाउँमा पुगेका भनिएका सिंहदरबारको सिङ चाहिँ भाँच्चिएको टिप्पणी उनीहरूको थियो ।