मधेश प्रदेशमा सशस्त्रद्वारा छ महिनामा २४ करोडभन्दा बढिको सामान नियन्त्रणमा

काठमाडौं । सशस्त्र प्रहरी बल नेपालले मधेश प्रदेशका जिल्लाहरुमा विगत ६ महिनामा २४ करोड रुपैयाँभन्दा बढीको अवैध सामान नियन्त्रणमा लिएको छ ।

२०७९ चैतदेखि २०८० भदौ १५ गतेसम्मको अवधिमा सशस्त्र प्रहरी बल नेपाल नं. २ छिन्नमस्ता बाहिनी मुख्यालय महोत्तरी तथा मातहतका इकाईहरुले २४ करोडभन्दा बढिको अवैध सामान नियन्त्रणमा लिएका हुन् ।

सो अवधिमा २० करोड ७७ लाख ६ हजार १ सय ४४ रुपैयाँ बराबरको चोरीपैठारीको किराना सामान, लत्ताकपडा, मोटर पार्ट्स, सवारी साधन लगायतका सामान नियन्त्रणमा लिई सम्बन्धि नियकायमा बुझाइसकेको छ ।

त्यस्तै, १ करोड १ लाख ४४ हजार ३ सय ९३ रुपैयाँ बराबरको पशुचौपाया, श्रोत नखुलेको नेपाली रुपैयाँ ९९ लाख ४ हजार ३ सय १५, भारतीय रुपैयाँ २८ लाख १७ हजार ३ सय १५ समेत बरामद भएको छ ।  यसैगरी, सोही अबधिमा ७९ लाख ४२ हजार ६ सय ५० रुपैयाँ बराबरको करीव २ हजार ८ सय १३ क्यूफिट काठ र ८ लाख ४८ हजार ५ सय ५३ रुपैयाँ बरारको सुन तथा चाँदी बरामद गरेको छ ।

यसैगरी, सोही अवधिमा करीव १ हजार ३ के.जी. गाँजा, ३७.७१ के.जी. चरेश, ५ हजार ७ सय ७ वटा विभिन्न किसिमका लागूऔषध (नर्फिन, फेनार्गन, डाईजेपाम, कोरेक्स, सिरिन्ज, नाईट्रोभेट) ट्याब्लेट बरामद भएको छ ।

त्यस्तै, ४ नाल हतियार, २० वटा गोली, २ वटा म्याग्जिन र १२ वटा कार्टिज बरामद भएको छ । भारतमा बेचबिखन गर्न लगिएका २० जना नेपाली चेलीबेटीहरुको उद्धार गरिएको छ, भने सो कार्यमा संलग्न रहेका १ सय १० जनालाई पक्राउ गरिएको छ ।

चोरीपैठारी लगायतका कार्यमा प्रयोग भएका ६ सय ४६ वटा विभिन्न कम्पनीका सवारी साधन समेत बरामद गरी भन्सार दाखिला गरेको छ । दशैं तिहारमा हुन सक्ने चोरी तस्करी नियन्त्रणका लागि समेत मधेस प्रदेशको सिमा नाकामा व्यापक रुपमा सुरक्षाकर्मी परिचालन गरिएको छ ।