इजरायलको बंकरमा रहेका विपिनसँग प्रधानमन्त्रीको कुराकानी- नआत्तिनुस्, काम गर्दैछौं (भिडिओ)

काठमाडौं । प्रधानमन्त्री पुष्पकमल दाहाल प्रचण्डले इजरायलको युद्ध क्षेत्रमा रहेका नेपाली विद्यार्थीसँग कुराकानी गरेका छन् । इजरायलमा हमासको आक्रमणपछि बंकरभित्र रहेका नेपाली विद्यार्थी टीम लिडर विपिन सुवेदीसँग प्रधानमन्त्रीले कुराकानी गरेका हुन् ।

कुराकानीको क्रममा प्रधानमन्त्रीले इजरायल घटनाको बिषयमा छलफल गर्नको लागि क्याबिनेट र सर्वदलीय बैठक पनि बोलाइएको जानकारी गराएका छन् ।

भिडिओ

उनले भने, ‘अब अघि नै भने अनुसार राजदूतावासमा कुरा पनि भइरहेको छ । अहिले परराष्ट्रमन्त्रीस्तरमा पनि कुुरा भइरहेको छ । हामीले प्रयास गरिरहेका छौं ।’

संवादको क्रममा विपीनले आफूहरु एउटा पासपोर्ट ब्यागमा हालेर रेडि भएर बसिरहेको भन्दै छिटोभन्दा छिटो नेपाल फर्काइदिन आग्रह गरेका छन् । जवाफमा प्रधानमन्त्रीले अहिले नेपाल फर्काउनको लागि आफूहरु सक्रियतापूर्वक काम गरिरहेको बताए ।

प्रधानमन्त्रीले विपिनलाई भनेका छन्, ‘तपाईंले त्यहाँ विद्यार्थीसँग लगातार कम्युनिकेट गरिदिुनपर्यो । र एकथरी मान्छेहरू ह्याभोक क्रियट गर्न खोजिरहेका हुन्छन् एकाध मान्छेहरू ।’

सुदूरपश्चिम विश्वविद्यालयबाट ‘लर्न एण्ड अर्न’ कार्यक्रममा इजरायल गएका ४९ विद्यार्थीहरूमध्ये १० जनाको निधन भइसकेको छ । अन्य केही विद्यार्थी घाइते भएका छन् भने केहीले बंकरबाट उद्धारका लागि याचना गरिरहेका छन् ।