‘भष्मे डन’को ट्रेलरमा विपीनको एकछत्र, वर्षा गयल

काठमाडौं। यहीँ कात्तिक ४ गते शनिबारबाट रिलिजको तयारीमा रहेका चलचित्र ‘पश्पति प्रसाद २–भष्मे डन’को ट्रेलर सार्वजनिक गरिएको छ। टुकी आर्टसको प्रस्तुतीमा तयार पारिएको चलचित्रको ट्रेलरमा भष्मे डनको भुमिका निर्वाह गरेका अभिनेता विपीन कार्कीले एकछत्र राज गरेका छन्। ट्रेलरमा नायिका स्वस्तिमा खड्का र अर्का दुई नायकहरु सौगात मल्ल र रवीन्द्र सिंह बानियालाई अटाए तापनि अर्की नायिका वर्षा सवाकोटी भने गयल छिन्। उनलाई ट्रेलरमा कहीँकतै अटाईएको छैन।

‘पशुपति प्रसाद २–भष्मे डन’ सातवर्ष अघि रिलिज भएको चलचित्र ‘पशुपति प्रसाद’ को सिक्वेल हो। चलचित्र नै भष्मे डनमा समर्पित भएर हुन सक्छ ट्रेलरमा अरुलाई भन्दा विपिन कार्कीलाई बढी फोकस गरिएको छ। ट्रेलरमा नायिका सिवाकोटीलाई कहीँकतै सानो भुमिकामा पनि देखाईएको छैन। ट्रेलरको टाइटलमा समेत उनको नाम राखिएको छैन।

उनको नाम हेर्न भित्री विवरण नै खोतल्नुपर्छ। ट्रेलरमा उनी नहुनार्ले चलचित्रमा उनको भुमिका के र कति होला भन्ने कौतुहल जगाएको छ। उनी चलचित्रमा हुने नहुनेबारे फाइनल गर्न पनि निर्माण टिमलाई लामै सोच्नु परेको थियो। चलचित्रको घोषणा कार्यक्रममा समेत सिवाकोटी यो सिक्वेलमा हुने नहुने बारे केही फाइनल गरिएको थिएन। हुन त, चलचित्रको पहिलो सिरिजमा पनि उनको खासै लामो भुमिका थिएन। उनलाई बोल्न नसक्ने युवतीको सानो रोलमा प्रस्तुत गरिएको थियो।

चलचित्रलाई निर्माता खगेन्द्र लामिछानले निर्माण गरेका हुन्। चलचित्रको कथा पनि उनी स्वयंमको हो। बनिश शाहले सम्पादन गरेको चलचित्रलाई निर्देशक दिपेन्द्र के खनालले निर्देशन गरेका हुन्। चलचित्रमा छायांकनको पाटो कृष्णबहादुर थापाले सम्हालेका छन भने डि.ओ.पी निरज कँडेलको छ।