पार्किन्सनबाट थलिएका पुराना माओवादी नेता पदम- सरकारले निर्णय गरेको रकम नपाउँदा उपचारमा समस्या

काठमाडौं । नेकपा माओवादी केन्द्रका केन्द्रीय सदस्य एवं पूर्वमन्त्री पदमबहादुर राई ‘विकास’ बिरामी परेका छन् । राईलाई पार्किन्सन रोग देखिएको पारिवारिक स्रोतले जनाएको छ । एक वर्ष अघिदेखि बिरामी परेका विकासको उपचारमा आर्थिक अभाव भएको छ ।

पछिल्लो समय ३ महिनादेखि उनी काठमाडौंको मेदान्त अस्पतालको बेडमा छन् ।

माओवादीका पुराना नेता राईको परिवार पार्टी अध्यक्ष पुष्पकमल दाहाल ‘प्रचण्ड’ ले सरकारको नेतृत्व गरेको बेला केही ठोस सहयोगको आशमा छन् । तर, अहिले सीमित नेताले व्यक्तिगतरूपमा सहयोग गरिरहेको परिवारका एक सदस्यले बताए ।

‘जिल्लाका केही नेता आएर व्यक्तिगत सहयोग गर्नुभयो । क्याविनेटले ५ लाख दिने निर्णय गरेको भनेपछि अर्थमन्त्रालय गयौं तर निकासा रोकेको भनेर त्यो पनि पाएका छैनौं । बचाउन समस्या भइरहेको छ’, एक सदस्य बताउँछन् ।

विकासको उपचारमा पार्टी कार्यालयले पैसा नभएको भन्दै ५० हजारको चेक दिएको थियो । आफन्त, शुभेच्छुक र समकालीन नेताले सहयोग गरेको रकमले ३ महिनाको अस्पतालको खर्च जसोतसो धानेपनि थप उपचारमा समस्या भएको उनका आफन्तको भनाइ छ ।

‘थेरापीलगायतको अस्पताल खर्च मासिक डेढ लाख छ । केही सुधार पनि देखिएको छ । आफैँ सामान्य हिँडडुल गर्नुहुन्छ । आशा त पलायो तर यहाँ भन्दा अघि के गर्ने अलमलमा छौं’, एक सदस्य भन्छन् ।

भोजपुर बोयाका पदम केही समययता काठमाडौं बस्दै आएका थिए । पार्टी सरकारमा हुँदा पनि युद्धकालीन समय र राजनीतिक परिवर्तनमा योगदान गरेका राईको उपचारमा चासो नदेखाइएको भन्दै जिल्लाका नेताहरूले सामाजिक सञ्जालबाट आक्रोश व्यक्त गरेका छन् । भोजपुरका माओवादी नेता राजेश खतिवडा राईको उपचार राज्यले गर्नुपर्ने बताउँछन् ।

को हुन् विकास ?

भोजपुर षडानन्द नगरपालिका बोयाका पदम २०४२/४३ देखि नै अखिल छैटौं (मोटो मसाल) बाट राजनीतिमा आएका थिए । भोजपुरमा माओवादी आन्दोलनको बिजारोपणमा भूमिका खेलेका उनीलगायतका टीमको प्रभावमा तत्कालीन बोया गाविस- ८ बेखुम्चामा संयुक्त जनमोर्चाले वडाध्यक्ष जितेको थियो । जनयुद्ध सुरू हुनुअघि देखि नै उनी माओवादीमा संगठित थिए ।

विकासले युद्धकालमा सुनसरी जिल्ला सेक्रेटरी, भोजपुर-खोटाङ सेक्रेटरीको जिम्मेवारी सम्हाले । उनी भोजपुर, खोटाङलगायतका पूर्वी पहाडी जिल्लामा शालिन र लोकप्रिय नेताका रूपमा परिचित थिए । पहिलो संविधानसभा निर्वाचनमा भोजपुर- १ बाट प्रत्यक्ष चुनाव जितेका राई भौतिक योजना तथा निर्माण राज्यमन्त्रीसमेत बनेका थिए । राई अन्तरिम विधायिका पनि बनेका थिए ।

राई एकीकृत नेकपा माओवादी विभाजनपछि मोहन वैद्यतिर लागे । वैद्यको पार्टी फुटेपछि उनले नेत्रविक्रम चन्द ‘विप्लव’ साथ दिएका थिए ।

विप्लव समूहमा पोलिटव्युरो सदस्य रहँदा उनलाई सरकारसँग वार्ता जारी रहेको अन्तर्वार्ता दिएर पार्टी नीतिविपरीत बोलेको भन्दै निलम्बन गरियो । त्यसपछि उनी तत्कालीन नेकपा प्रवेश गरेका थिए ।