विश्व शान्तिका लागि सुरक्षा अंगको भूमिका बढाउन सरकारले कूटनीतिक पहल गर्छ: प्रधानमन्त्री प्रचण्ड

काठमाडौं । प्रधानमन्त्री पुष्पकमल दाहाल प्रचण्डले सीमित साधनस्रोत, जनशक्ति र अनेकौं चुनौतीका बीच पनि अपराध नियन्त्रण र अनुसन्धानका क्षेत्रमा नेपाल प्रहरीले विश्वस्तरमा महत्वपूर्ण काम गरेको बताएका छन् ।

६८औं प्रहरी दिवसको अवसरमा आयोजित कार्यक्रमलाई सम्बोधन गर्दै उनले आमनागरिकका हरेक सरोकार र राज्यका हरेक समस्यामा नेपाल प्रहरीले प्रथम पंक्तिमा रहेर समस्याको सम्बोधन र समाधान गरेको बताए ।

प्रधानमन्त्रीले भने, ‘आमनागरिकले दुःखमा सम्झिने पहिलो राज्य संयन्त्र नेपाल प्रहरी हुने गरेको छ, यो आफैंमा महत्वपूर्ण कुरा हो । प्रहरी समाजको एउटा यस्तो अंग हो, जो समाज सँगसँगै समय सापेक्ष परिवर्तन हुँदै जान्छ र जानु पनि पर्छ । नेपाल प्रहरीले पनि आफू र आफ्नो सेवा प्रवाहलाई समय सापेक्ष आधुनिकीकरण गर्दै अहिलेको अवस्थामा एउटा आधुनिक, दक्ष, जिम्मेवार अनि राष्ट्रिय साथै अन्तर्राष्ट्रिय जगतमा समेत प्रभावशाली प्रहरी संगठनको रूपमा स्थापित हुन सफल भएको छ ।’

उनले प्रहरी संगठनको क्षमता र दक्षतामा हुने अभिवृद्धिसँग सरकारको सफलता पनि समेटिने हुनाले यस संगठनको समय सापेक्ष आधुनिकीकरणमा सरकार अत्यन्त गम्भीर रहेको बताए ।

प्रधानमन्त्री प्रचण्डले भने, ‘प्रहरीको वृत्ति विकास, परिचालन र समन्वयमा नेपाल सरकारले वैज्ञानिक विधि र पद्धतिको पालना गरेको र यसले संगठनभित्र सबैले समान न्याय एवं आत्मसम्मानको प्रत्याभूत गरेको कुरा सिंगो देशले अनुभूत गरेको छ । नेपाल सरकार नेपाल प्रहरीका विभिन्न श्रेणीका अधिृकतदेखि जवानसम्म सबैको साझा अभिभावक हो, सबैलाई समान र न्यायपूर्ण व्यवहार गर्छ भन्ने कुरा व्यवहारबाटै प्रमाणित गरिएको छ । यसले संगठनमा सुदृढ एकता कायम गर्न, प्रहरी कर्मचारीको मनोबल उकास्न तथा संगठनभित्र सबैले आफ्नो जीवन देख्ने संस्कारको विकासमा महत्वपूर्ण योगदान पुर्‍याउँछ ।’

समाजमा बदलिँदो आपराधिक परिवेश, विश्‍वव्यापीकरणसँगै फैलिएको अन्तर्राष्ट्रिय अपराधको सञ्जाल, सूचना प्रविधिले ल्याएको विकास र यसले निम्त्याएको विनाश, अनुशासनहीनता सबै पक्षलाई मध्यनजर गरी नेपाल प्रहरीले आफ्नो स्वरूप र सेवा प्रवाहमा सोहीअनुकूल विकास र परिवर्तन गर्दै गएको उनले बताए ।

उनले भने, ‘सूचना प्रविधिको घातांकीय विकाससँगै अपराधका नयाँ नयाँ आयामहरू विकसित भइरहेको परिप्रेक्ष्यलाई दृष्टिगत गर्दै अपराध नियन्त्रण र अनुसन्धानमा नेपाल प्रहरीले आगामी दिनमा प्रविधिमैत्री संयन्त्र र विधिको भरपुर उपयोग गर्ने मैले विश्वास लिएको छु । बदलिएको परिस्थितिअनुरूप आफूलाई रूपान्तरित र परिमार्जन गरेरमात्र हरेक संस्था, नेतृत्व र व्यक्तिले आफ्नो नेतृत्व क्षमता राम्रोसँग प्रमाणित गर्न सक्छ भन्ने एउटा जीवन्त उदाहरण नेपाल प्रहरी हो ।’

नेपालको संविधानबमोजिम, नेपाल प्रहरीले संघीय संरचनामा जान रूपान्तरणको तयारी गरेको कार्यहरूसमेत महत्वपूर्ण रहेको उनले बताए ।

विश्‍वका विभिन्न द्वन्द्वग्रस्त क्षेत्रहरूमा शान्ति स्थापनार्थ नेपाल प्रहरीले संयुक्त राष्‍ट्रसंघमार्फत् प्रहरी कर्मचारीहरू पठाएर विश्‍व शान्तिमा समेत ठूलो योगदान पुर्‍याएको उल्लेख गरे ।

उनले भने, ‘आगामी दिनमा विश्व शान्तिका निम्ति नेपाल प्रहरीलगायतका देशका सुरक्षा अंगहरूको उपस्थिति र भूमिका बढाउने सन्दर्भमा सरकारले आवश्यक कूटनीतिक पहल लिनेसमेत यहाँहरूलाई जानकारी गराउन चाहन्छु ।’