गौतम बुद्ध अन्तर्राष्ट्र्रिय विमानस्थल नियमित सञ्चालनको माग गर्दै व्यवसायीको आन्दोलन

रुपन्देही । रुपन्देहीमा रहेको गौतम बुद्ध अन्तर्राष्ट्र्रिय विमानस्थल नियमित सञ्चालनको माग गर्दै यहाँका व्यवसायीले रिले अनसनदेखि आन्तरिक उडान र सीमानाका रोक्नेसम्मका आन्दोलन सार्वजननि गरेका छन् । व्यवसायीहरुको सञ्जाल रहेको सिद्धार्थ सञ्जाल रुपन्देहीले सोमबार पत्रकार सम्मेलन गरेर यस्ता आन्दोलनका कार्यक्रमहरू सार्वजनिक गरेको हो। सिद्धार्थ सञ्जाल रुपन्देहीमा रहेका विभिन्न संघसंस्थाको नेतृत्व गर्ने संस्था हो। सञ्जालमा जिल्ला प्रशासन कार्यालय रुपन्देहीमा दर्ता रहेका विभिन्न २५ भन्दा बढी संघसंस्था आबद्ध छन्।

सञ्जालले प्रधानमन्त्रीलाई ज्ञापनपत्र बुझाउनेदेखि विमानस्थलबाट आन्तरिक उडान रोक्ने र सीमानाका बेलहिया अनिश्चितकाललाई बन्द गर्नेसम्मका कार्यक्रमहरू सार्वजनिक गरेको छ।

सञ्जालका अध्यक्ष अनिल ज्ञवालीले विमानस्थल नियमित सञ्चालन गर्न पटक–पटक सचेत गराउँदा पनि सरकार मौन रहेकाले सरकारसँग अन्तिम लडाइँको रूपमा आन्दोलन गर्नुपरेको जनाएका छन् । उनले भने– ‘हामीले अरू विरोध गरेका होइनौँ। सरकारकै अर्बौँको लगानी रहेको विमानस्थल नियमित सञ्चालन गर्नुपर्‍यो भन्ने मात्र माग हो, यसबाट अर्बौं लगानी गरेका व्यवसायी चल्नै नसक्ने अवस्था भयो ।’ ‘विमानस्थल सञ्चालनका लागि सरकार तथा सम्बन्धित निकायलाई दबाब दिन आन्दोलनको विकल्प यहाँको आम सर्वसाधारण तथा उद्योगी व्यवसायीले देखेका छैनन्’ ज्ञवालीले भने ।

सञ्जालका वरिष्ठ उपाध्यक्ष चन्द्रप्रकाश श्रेष्ठले विमानस्थल पूर्णरुपमा सञ्चालन गर्न दबाबका लागि संघर्ष गर्दै अघि बढ्ने जनाएका छन् भने सिद्धार्थ सञ्जाल रुपन्देहीमा रहेका विभिन्न संघ–संस्थाको नेतृत्व गर्ने संस्था भएको महासचिव संजय बजिमयले बताए ।

सञ्जालले प्रधानन्त्रीलाई ज्ञापनपत्र बुझाउने, १५ गतेदेखि विभिन्न क्षेत्रका संघसंस्था, ट्राभल्स, एयरलाइन्सलगायतलाई पत्राचार गर्ने, प्रमुख जिल्ला अधिकारी, प्रहरी प्रमुख, नगरपालिका, गाउँपालिकालगायतका सरकारी निकाय तथा जनप्रतिनिधिहरूलाई भेटी ऐक्यबद्धताका लागि आग्रह गर्ने सञ्जालको तयारी छ।

त्यसैगरी, आन्तरिक उडान रोक्नका लागि विभिन्न एजेन्सीहरूलाई टिकट नकाटी आन्दोलनमा ऐक्यबद्धता जनाउन आग्रह गर्ने, नियमित उडानको माग गर्दै भैरहवामा सभा गर्ने कार्यक्रम तय भएका छन्।

दुई दिन विमानस्थलको गेटअगाडि धर्ना दिने र त्यति गर्दा पनि माग सम्बोधन नभए मंसिर २० पछि आन्तरिक उडान अनिश्चितकालका लागि रोक्न विमानस्थलको गेटमा धर्ना दिने र सीमानाका बेलहियासमेत ठप्प पार्ने गरी आन्दोलनका कार्यक्रम सार्वजनिक गरिएको छ।