नेपालको प्लेइङ ११ मा आज पनि ४ मिडियम पेसर, दीपेन्द्रको स्थानमा जोरा

काठमाडौं । टी-२० विश्वकप छनोटको फाइनलमा नेपालले आफ्नो प्लेइङ ११ मा एक परिवर्तन गरेको छ । अलराउन्डर दीपेन्द्रसिंह ऐरीको स्थानमा सन्दीप जोराले टीममा स्थान पाएका छन् ।

चोटका कारण प्रतियोगिताको छनोट चरण खेल्न नसकेका दीपेन्द्रलाई सेमिफाइनलमा प्लेइङ ११ मा राखिएको थियो । नेपालका लागि महत्त्वपूर्ण म्याच भएकाले दीपेन्द्र राम्ररी ठीक नभईकन खेल्न तयार भएका थिए । यद्यपि, उनले बलिङ र ब्याटिङ दुवै गर्नुपरेन । आज भने उनले बाहिरै बस्ने निर्णय लिएका छन् ।

दीपेन्द्रको स्थानमा मध्य क्रमका ब्याट्सम्यान जोरालाई ल्याइएको हो । नेपालले टीममा अरू परिवर्तन गरेको छैन । आज पनि नेपाल ४ जना मिडियम पेसर लिएर खेल्दैछ । करण केसी, सोमपाल कामी, गुल्शन झा र अविनाश बोहरा सबैले प्लेइङ ११ मा स्थान बनाएका छन् । स्पिनर ललित राजवंशी आज पनि छुटे । विशेषज्ञ स्पिनरका रूपमा सन्दीप लामिछाने मात्रै टिममा छन् । उनलाई पार्ट टाइम स्पिनर कुशल मल्लले साथ दिनेछन् ।