स्टेजमा ताण्डव देखाएका सुगम पोखरेलको दम्भपूर्ण प्रतिक्रिया- ‘एक्सनको रियाक्सन’ हो

काठमाडौं । अष्ट्रेलियाको एडिलेडमा आयोजित कन्सर्टमा उपद्रो देखाएका गायक सुगम पोखरेलले आफ्नो हर्कतको बचाउ गर्न खोजेका छन् । दम्भपूर्ण प्रतिक्रिया दिँदै उनले आफूले ‘एक्सनको रियाक्सन’ गरेको बताए ।

घटनापछि टिकटकमा एउटा भिडिओ पोस्ट गर्दै सुगमले यस्तो प्रतिक्रिया दिएका हुन् । घटनालाई लिएर उनले किञ्चित पनि जिम्मेवारीवोध गरेका छैनन् । उल्टै ‘नेपाली समाज संवेदनाहिन बनेको’ सुगमको टिप्पणी छ ।

भिडिओमा उनले भनेका छन्, ‘के हाम्रो नेपाली समाज यति संवेदनाहिन भएको हो र ? सन्दर्भ, अहिले हल्का भाइरल भइराखेको रहेछु म, (दारी मुसारेर मुस्काउँदै) हिजो एडिलेडको कार्यक्रमबाट ।’
उनले नेपालमा भूकम्पबाट मृत्यू भएकाहरूप्रति मौनधारण गर्न भन्दा दर्शकले नमानेको आशय व्यक्त गरेका छन् ।

सुगमको भनाइ छ, ‘अहिले देशलाई दुखिरहेको छ खासमा । देशलाई दुख्दा मलाई पनि दुख्छ, म नेपाली कलाकार, तपाईंहरूले गर्दा म भाछु । हिजोको कार्यक्रममा मौनधामरण गर्दा.. यू क्यान सी इन द भिडिओ… देख्न सक्नुहुन्छ । मेरो एक्सनको रियाक्सन त्यसकै कारणले मात्रै थियो । कसैको मनलाई दुखाएँ भने क्षमा चाहन्छु तर नेपाली संगीतको सेवा गर्नेछु ।’

सुगमले रक्सीले मातेर स्टेजमा आएको तथा दर्शकलाई माइकले झट्टी हानेको विषयमा कुनै प्रष्टीकरण दिएका छैनन् ।